Ish-kandidati për kryetar të Drenasit, Driton Ajazi, e ka kritikuar kryetarin e kësaj komune, Ramiz Lladrovci.
Ai ka thënë se Lladrovci ka abuzuar me besimin e PDK-së në Drenas.
Në emisionin “Info Nata” në Tëvë1, Ajazi ka thënë se një gjë e tillë ka qenë e pafalshme.
“Lladrovci tash e 9 vite ka qeverisur në Drenas. Ai ka abuzuar me besimin e Partisë Demokratike të Kosovës, dhe këto janë të pafalshme. PDK-ja dhe lidershipi i saj kanë ardhur në përfundim se nuk mund të vazhdohet më me të,”, është shprehur ai.
Ajazi ka bërë me dije se Lladrovci duhet të shkarkohet nga pozita e ushtruesit të detyrës së kryetarit degës së PDK-së në Drenas.
“Patjetër që po. Ai aktualisht është ushtrues detyre i degës, por ka krijuar një strukturë sipas dëshirës së tij. Nuk ka logjikë të mbetet më në atë pozitë kur tashmë ka krijuar subjektin e tij politik. Ai nuk përfaqëson më PDK-në dhe besoj se lidershipi do të marrë vendimet e duhura”, ka thënë ai Ajazi.
