Përparim Rama nga Lidhja Demokratike e Kosovës (LDK) dhe Hajrulla Çeku nga Lëvizja Vetëvendosje (LVV) janë përballur mbrëmë për herë të parë në një debat të drejtpërdrejtë në emisionin Pressing në T7, në kuadër të garës për balotazhin për kryetar të Prishtinës. Debati u karakterizua nga përplasje të ashpra, akuzë e kundërakuzë, dhe pak hapësirë për diskutim të qetë mbi programet e tyre për kryeqytetin.
Në pyetjen se a u ka ndryshuar mendimi për njëri-tjetrin gjatë fushatës, Rama tha se gara duhet të zhvillohet “në aspektin e ideve e koncepteve”, duke theksuar se ka hasur në “probleme të mëdha në nivel qendror”. Ndërsa Çeku u shpreh se “politika duhet të depersonalizohet”, por se “mendimi për Ramën i ka ndryshuar rrugës për shkak të qasjes jokorrekte të tij”.
Tema më e nxehtë e debatit ishte buxheti i Prishtinës.
Rama akuzoi Qeverinë Kurti se ka bllokuar tri herë aprovimin e buxhetit të kryeqytetit dhe “të hyrat vetanake të komunës”. Ai pyeti Çekun nëse “vepron sipas Kushtetutës së Kosovës apo të Vetëvendosjes”.
Në anën tjetër, Çeku tha se komuna e Prishtinës ka dështuar ta miratojë buxhetin me kohë, duke shtuar se “edhe Gjilani e Zubin Potoku kanë kaluar jashtë afateve ligjore”. Ai e quajti Ramën “bllokues” dhe e akuzoi për “demagogji para qytetarëve”.
Përveç buxhetit, kandidatët u përplasën për disa projekte madhore të kryeqytetit:
Rruga A: Çeku e quajti Ramën “dështakun më të madh të pasluftës”, duke thënë se fondet për këtë projekt ishin ndarë prej kohësh, por nuk kishte lëvizje nga komuna. Rama iu kundërpërgjigj se “projektet nuk shtyhen me demagogji”.
Palestra e basketbollit: Rama tha se janë propozuar dy pika për këtë projekt, por akuzoi Çekun për “pavërteta ligjore”.
Spitali i Prishtinës: Çeku pretendoi se komuna e Ramës e ka “mashtruar një donator ndërkombëtar duke i prezantuar shumë trefish më të lartë”, ndërsa Rama e quajti këtë “rrenë e demagogji”.
Transporti publik: Çeku tha se “transporti në Prishtinë ka dështuar” dhe se Rama po përpiqet “t’i japë një kozmetikë në fund të mandatit”. Rama këmbënguli se bllokada e Qeverisë e ka pamundësuar pagesën e operatorëve privatë për muaj të tërë.
Pothuajse gjatë gjithë debatit, të dy kandidatët e ndërprisnin vazhdimisht njëri-tjetrin, duke akuzuar për “gënjeshtra”, “manipulime” dhe “demagogji”. Çeku disa herë kërkoi “një debat normal”, ndërsa Rama këmbëngulte se po fliste “me fakte”.
Rama tha se gjatë mandatit të tij Prishtina është “transformuar” dhe se nëse fiton, do të fokusohet në përfundimin e unazës së qytetit, ndërtimin e stacionit të autobusëve dhe ndërtimin e dhjetë shkollave të reja.
Çeku, nga ana tjetër, tha se “transformimi i Ramës ekziston vetëm në Facebook”, duke premtuar “qeverisje korrekte, bashkëpunim me nivelin qendror dhe shërbime efikase për qytetarët”.
