Sot paradite, Kuvendi i Kosovës është përballur me një situatë të pazakontë. Një kërcënim për bombë, që erdhi përmes një telefonate, bëri që Policia të evakuojë urgjentisht të gjithë të pranishmit. Deputetët, gazetarët dhe stafi u larguan menjëherë nga objekti i Kuvendit si masë sigurie, ndërsa seanca u ndërpre.
Lajmi u përhap me shpejtësi në mediat vendore, ndërsa deputetët reaguan me shqetësim dhe pasiguri. Abelard Tahiri nga PDK tha se situata ishte e paqartë dhe se ata u detyruan të largohen pa informacione të plota:
“Na dhanë udhëzime me dalë, sepse ka një kërcënim me gjasë. Nuk e dimë çka po ndodh dhe na kërkuan me dalë”, tha Tahiri për media.
E të njëjtit mendim ishte edhe Vlora Çitaku, gjithashtu nga PDK, e cila deklaroi se nu kanë shumë informacione se si erdhi deri te ky lajmërim për bombë.
“Siç duket ka pasur ndonjë kërcënim për ndonjë sulm apo diçka të ngjashme. Nuk kemi informatë të saktë, vetëm na thanë të largohemi.”
Ndërkohë, Glauk Konjufca nga VV shkurt konfirmoi se kërcënimi ka ardhur përmes telefonit.
Ndërsa Time Kadrijaj nga AAK, kërkoi që të ndërmerren masa serioze për ta zbardhur rastin: “Tash është në dorën e Policisë me e zbulu rastin dhe kush e bëri këtë telefonatë.”
Pas më shumë se një ore kontrollesh intensive nga njësitë speciale, njësia për deminim dhe qentë e trajnuar K-9, nuk u gjet asnjë mjet shpërthyes në ambientet e Kuvendit apo në veturat e zyrtarëve. Policia konfirmuan se bëhej fjalë për një alarm të rremë.
Këtë e konfirmoi edhe kryeprokurori i Prokurorisë Themelore në Prishtinë, Zejnullah Gashi, i cili tha për media: “Pas verifikimit të plotë nga njësitë përkatëse, është vërtetuar se alarmi për bombë ka qenë i rremë.”
Ndërkohë, sekretari i Kuvendit, Arben Loshi, ka bërë të ditur se seanca e ndërprerë do të rifillojë sonte në ora 20:00, pasi janë krijuar kushtet për vazhdimin normal të punimeve.
Policia ka nisur hetimet për të zbuluar kush qëndron pas këtij kërcënimi të rremë, ndërsa institucionet kërkojnë që puna e Kuvendit të vazhdojë pa u ndikuar nga veprime që synojnë të krijojnë pasiguri dhe destabilitet.
