Investime në infrastrukturë, shërbime më të mira publike, arsim gjithë-ditor e rregullim urban premtuan kandidatët për kryetar të Komunës së Gjilanit në “Debat Përnime”.
Katër vite më parë, në zgjedhjet lokale të vitit 2021, Alban Hyseni, nga Lëvizja Vetëvendosje kishte fituar Gjilanin përballë Lutfi Hazirit të Lidhjes Demokratike të Kosovës. Sipas rezultateve të Komisionit Qendror të Zgjedhjeve, Hyseni kishte marrë 51.10% apo 21 mijë e 800 vota, ndërsa Haziri kishte marrë 48.90% apo 20 mijë e 865 vota.
Pas një mandati qeverisje, Alban Hyseni i LVV-së synon sërish qeverisjen në Gjilan. Nga LDK, në këto zgjedhje garon Arbër Ismjali, ish nënkryetari i Lutfi Hazirit, ndërsa nga Aleanca për Ardhmërinë e Kosovës, Nazim Gagica, po ashtu ish-drejtor në kohën e Lutfi Hazirit, Riad Rashiti nga Partia Demokratike e Kosovës, ish-drejtor në qeverisjen e Alban Hysenit dhe Isa Agushi nga Bashkimi për Ndryshim Anamorava.
Në “Debat Përnime” kandidatët për kryetar të Gjilanin shpalosën programin për katër vitet e ardhshme për ndërtimet pa leje, shërbimet publike, infrastrukturën, arsimin e barazinë gjinore.
Mirëpo, në një moment kandidati i LDK-së, Arbër Ismajli është vënë nb ‘grackë’ nga kryetari Alban Hyseni, i cili e pyeti: “A e ka parë ndonjëherë repartin e Radiologjisë në kuadër të QKMF-së në Gjilan dhe investimet që i kemi bërë aty?”
Në pyetjen e Alban Hysenit, Arber Ismajli u përgjigj duke thënë: “Sa i përket vizitës në repartin e Radiologjisë, e kam vizitu, por a dinë çka është skandali që nuk ka shampon me i la duart njerëzit”.
Por që Ismajli i LDK-së doli në rrenë, pasi që kryetari Hyseni tha: “Është shumë interesante kjo përgjigje, sepse në QKUK nuk ka repart të Radiologjisë. Secili njeri që jeton në Kosovë e dinë që repartet e Radiologjisë janë në sistemin sekonadar shëndetësor dhe terciar, jo në sistemin primar.”
