Profesori Bujar Dugolli deklaroi në Pressing në T7 se një nga zgjidhjet për zhbllokimin e Kuvendit është “tërheqja e Albulena Haxhiut” në mënyrë vullnetare si kandidate për postin e Kryetares së Kuvendit të Kosovës.
Ai tha në Pressing në T7 se nëse nuk zgjidhet për 8 herë radhazi, Haxhiu duhet ta kuptojë se nuk e duan dhe të tërhiqet.
“Unë mendoj që kandidatja Albulena Haxhiu, vetë, pa pas nevojë partia duhet të tërhiqet për faktin se ajo përbërje e Kuvendit nuk e dëshiron dhe tash kur të bëhet deri në 8 herë është fakt i mjaftueshëm për të kuptu që një përbërje e legjislativit nuk e don një grua të jetë kryetare e Kuvendit siç është Albulena Haxhiu, nuk e dojnë as Donika Gërvallën”, tha Dugolli.
Pastaj panelistët i thanë Dugollit se nuk bëhet fjalë për “çështje gjinore”.
Ndërsa, Dugolli vijoi se emri i Albulena Haxhiut nuk duhet bërë pengesë e ndërtimit të institucioneve dhe të shkojë “në pakufi ky ping-pong politik dhe duke e dëmtu edhe atë kandidate”, tha Dugolli për bllokimin e Kuvendit.
