Alma Lama ish-ambasadore e Kosovës në Itali thotë se mbajtja e shamive nga gratë myslimane përfaqëson nënshtrimin.
Gjatë një debati në Euronews Albania lidhur me kërkesën për rikthimin e shamive në shkolla për vajzat myslimane, ish-ambasadorja ka debatuar ashpër me avokaten Migena Balla, e cila e cilësoi një të drejtë të vajzave myslimane mbajtjen e shamisë.
Sipas Lamës, shamia është simbol i islamit politik, që siç tha në Kosovë po financohet nga bota arabe dhe po mbështetet nga një pjesë e politikës.
“Thelbi është se shamia është simbol i islamit politik, që ka në themel sheriatin dhe është lëvizje politike. Islami politik ka qëllime politike për t’u përhapur në vende të ndryshme, përfshi edhe Kosovën dhe shamia është simboli më i dukshëm i kësaj axhende, është edhe mësimi fetar në shkolla, që e bën këtë lëvizje në shpërputhje me vlerat perëndimore mbi të cilat është ndërtuar shteti i Kosovës. Islami politik synon të futet në institucione dhe në shkolla. Fonde nga bota arabe synojnë ta financojë këtë axhendë në Kosovë, ku kemi deputetë dhe kryeministrin që e mbështet”, tha Lama.
Avokatja Balla i cilësoi fantazi dhe përhapje paniku deklaratat e ish-ambasadores, ndërsa tregoi se ajo vetë ishte mbuluar me dëshirën e saj, pa u detyruar nga askush.
