Ambasador britanik në Kosovë, Jonathan Hargreaves, ka reaguar në lidhje me kërcënimet e bëra ndaj presidentes Vjosa Osmani, duke u shprehur ‘‘thellësisht i shqetësuar’’.
Ai ka deklaruar edhe se, dhuna në bazë gjinore, duke përfshirë këtu edhe atë që bëhet përmes Internetit, nuk ka vend në shoqërinë tonë.
‘‘Jam thellësisht i shqetësuar nga kërcënimet e fundit dhe vala në rritje e gjuhës së urrejtjes që po drejtohet ndaj grave, veçanërisht ndaj atyre në role udhëheqëse. Dhuna me bazë gjinore – përfshirë atë në internet – nuk ka vend në shoqërinë tonë. Ne qëndrojmë në krah të Grupit për Siguri dhe Barazi Gjinore dhe e mbështesim plotësisht deklaratën e tyre të përbashkët. Në kohë si këto, heshtja nuk është një opsion. Ne zgjedhim solidaritetin” ,ka thënë Hargreaves.
Ashtu siç ka thënë Jess Phillips, ministre britanike për Mbrojtjen dhe Luftën Kundër Dhunës ndaj Grave dhe Vajzave:
“Asgjë nuk do të ndryshojë, nëse nuk e bëjmë sistematike që kushdo që përballet me një viktimë apo një dhunues, ta ndjejë si detyrë thelbësore të ndërmarrë veprim’’, ka shkruar ai.
Ndryshe, ambasadori britanik këtë koment e ka bërë pasi ka ndarë reagimin e ‘‘UN Women Kosovo’’, Grupi për Siguri dhe Barazi Gjinore pikërisht lidhur me kërcënimet e bëra ndaj Osmanit, grup i cili ka dënuar ashpër këto kërcënime.
Aty është theksuar se këto akte janë sulme edhe ndaj demokracisë dhe jo vetëm ndaj presidentes.
Në komunikatë, bëhet thirrje për institucionet shtetërore, partitë politike por edhe shoqërisë civile e mediave që të ndërmarrin veprime të menjëhershme dhe të koordinuara për të mbrojtur gratë në politikë dhe për të u siguruar që ato mund të udhëheqin pa frikë.
‘‘Deklaratë mbi kërcënimet ndaj presidentes Vjosa Osmani dhe nevojën e menjëhershme për të trajtuar dhunën ndaj grave në politikë. Grupi për Siguri dhe Barazi Gjinore dënon ashpër kërcënimet me vdekje të bëra së fundmi ndaj SH.S.Z. presidentes së Kosovës, Vjosa Osmani-Sadriu. Akte të tilla frikësimi dhe kërcënime të kësaj natyre nuk janë vetëm sulm ndaj presidentes Osmani si person, por edhe sulm ndaj demokracisë, sundimit të ligjit dhe parimit të paqes e stabilitetit. U bëjmë thirrje institucioneve shtetërore, partive politike, shoqërisë civile dhe mediave që të ndërmarrin veprime të menjëhershme dhe të koordinuara për të mbrojtur gratë në politikë dhe për të u siguruar që ato mund të udhëheqin pa frikë’’, shkruhet në komunikatë.
Tutje, aty shprehet edhe solidaritet i plotë me Osmanin dhe rikonfirmohet mbështetja për sigurinë e të gjithë zyrtarëve publikë pa dallim gjinie.
‘‘Shprehim solidaritet të plotë me presidenten Osmani dhe rikonfirmojmë mbështetjen tonë të palëkundur për sigurinë, mbrojtjen dhe dinjitetin e të gjithë zyrtarëve publikë, pa dallim gjinie, që shërbejnë me integritet dhe përkushtim. Nuk ka vend për dhunë apo frikësim në shoqëritë demokratike’’, thuhet në reagim.
