Sistemi shëndetësor në sektorin privat është karakterizuar me skandale të shumta viteve të fundit, për shkak të mbikëqyrjes jo të duhur nga organet përgjegjëse shtetërore, ku për pasojë pacientët shpeshherë kanë pësuar shkaku i shërbimeve jo-profesionale.
Veriu.info ka siguruar një vendim të Inspektoratit Shëndetësor me të cilin është gjobitur me 4 mijë euro ordinanca stomatologjike “Dental Care” me pronar Ardian Selani.
Në arsyetimin e Inspektoratit Shëndetësor thuhet se më datë 8 shtator 2025 është bërë inspektimi i SPSh “Dental Care” – Ambulancë Stomatologjike” në Prishtinë me themelues Ardian Selani, ku nuk është prezantuar licenca për ushtrimin e veprimtarisë si Ambulancë Stomatologjike.
Inspektorati Shëndetësor si parregullësi konstaton edhe punën në këtë klinikë të Leutrim Rekaliu, i cili në kohën e inspektimit nuk ka pasur licencë profesionale të punës, gjë të cilën e ka konfirmuar edhe Oda e Stomatologëve përmes një e-maili më datë 10.09.2025.
Në dokumentet e siguruara nga Veriu.info, thuhet se Antishok terapia e “Dental Care” nuk ishte e kompletuar, nuk ka regjistër të pacientëve dhe nuk ka kontratë për asgjësimin e mbetjeve medicinale.
Ndryshe, nëse në një ordinancë stomatologjike nuk është e kompletuar Antishok terapia, atëherë për pacientin mund të paraqiten rreziqe, si: rrezik për jetë, mungesë oksigjeni, përkeqësim i reaksioneve alergjike dhe pamundësi për stabilizim deri në ardhjen e emergjencës.
Në regjistrin e licencave valide të lëshuara nga Oda e Stomatologëve të Kosovës, Leutrim Rekaliu figuron se është licencuar tek më 16 dhjetor 2025, gjë që konfirmohet se ai kishte punuar pa licencë në ordinancën “Dental Care”.
