Analisti politik dhe aktivisti i shoqërisë civile në Podujevë, Shemsi Jashari, ka ironizuar me Lëvizjen Vetëvendosje të Albin Kurtit, pas përurimit të shtatores së ish-presidentit Ibrahim Rugova në këtë komunën e Podujevës.
Ai ka thënë se VV-jaa do ta shfrytëzonte politikisht edhe ish-presidentin Hashim Thaçi po të mos ishte gjallë, transmeton Veriu.info.
“Rugovizmi i Vetëvendosjës. Shyqyr që është Hashim Thaçi gjallë se, edhe përmendoren e tij e kishin vendosë veç me fitu naj votë”, ka shkruar ai.
Lidhur me përurimin e shtatores së Ibrahim Rugovës ka pasur një sërë reagimesh ndaj partisë në pushtet. Kjo pasi që Lëvizja Vetëvendosje ishte shumë kritike sa ishte në opozitë pë veprimtarinë e Ibrahim Rugovës.
Albin Kurti kishte refuzuar të shkonte në varrimin e Rugovës. Asokohe në komunikatën e VV’së mos-prezenca e Kurtit arsyetohej duke thënë se pjesëmarrës nuk ishin as familja Jashari, kinse të vetëdijshëm për dëmin politik që ia kishte bërë ish-presidenti Rugova dhe fryma rugoviane.
“Në varrimin e Rugovës nuk ishte familja Jashari, nuk ishte Lëvizja VETËVENDOSJE! dhe nuk ishin edhe shumë bashkëluftëtarë e atdhetarë të cilët e dinin dëmin politik që Kosovës i bëri Rugova e rugovizmi. Por ti ishe aty dhe nuk të vinte fare turp sepse tani më nuk dalloheshe nga ai. Jo vetëm që flisje si ai, por tani ishe mësuar që edhe të silleshe si ai. Të ka mbetur vetëm edhe gur të fillosh të shpërndash”, thuhej në komunikatën e emërtuar “Gjaku i humbur”, ku sulmohej edhe ish-presidenti Hashim Thaçi.
“Ai (Rugova) ishte kolaboracionist sepse nuk ishte betuar asnjëherë për çlirimin e Kosovës, kurse ti je tradhtar i kombit sepse e ke shkelur betimin e dhënë. Dallimi tjetër është se ai nuk mund të na mashtrojë më, e ti potencialisht e ke ende një mundësi të tillë”, deklarohej tutje në komunikatë.
Kjo komunikatë, sikurse shumë komunikata të tjera kontroverze, janë larguar nga platforma ‘online’ e uebfaqes së Lëvizjes Vetëvendosje.
