Artan Nimani nga Nisma Socialdemokrate, ka folur për arsyet e dështimit të marrëveshjes për konstituimin e Kuvendit të Kosovës, duke theksuar mungesën e vullnetit nga ana e Lëvizjes Vetëvendosje për të përmbushur një kusht të dakorduar.
“Shumë e thjesht – nuk kanë qenë të mjaftueshëm numrat për formimin e Qeverisë Kurti 3”, deklaroi Nimani, duke hedhur poshtë pretendimet se VV kishte shumicën e nevojshme.
Ai theksoi se kërkesa e vetme e Nismës ka qenë posti i kryetarit të Kuvendit.
“Kushti ynë i vetëm ka qenë kryetari i Kuvendit – marrëveshja për qeverisje në legjislativ, një kusht i premtuar dhe i dakorduar nga z. Kurti. Por më pas, në ditën e fundit të pjesës së parë të seancës konstituive, situata ndryshoi”, tha Nimani.
Sipas tij, Lëvizja Vetëvendosje pati marrëveshje me partitë minoritare dhe numrat ekzistonin, por, siç shprehet ai, “Kurti ka insistuar vetëm në ekzekutiv dhe pjesëmarrje në qeveri, duke përjashtuar kryetarin e Parlamentit”.
Nimani përmendi edhe “oferta të vonshme nga Kurti për poste në qeveri”, por theksoi se ato nuk ishin në përputhje me dakordimin fillestar.
Ai përfundoi duke thënë se ky veprim i VV-së tregoi mungesë serioziteti dhe besueshmërie në partneritet politik.
