Në kuadër të hulumtimeve për parregullsitë në sektorin privat të shëndetësisë, Veriu.info ka siguruar një raport inspektimi dhe një vendim të Inspektoratit të Ministrisë së Shëndetësisë me të cilat konstatohen parregullsi në funksionin e spitalit “American Hospital Kosova” Sh.P.K. me themelues Klodian Allajbeu, me ç’rast këtij spitali privat i është shqiptuar edhe një gjobë për shkelje të dispozitave të Ligjit për Shëndetësi.
Në arsyetimin e vendimit nr. 05-943 të datës 17.06.2025 të siguruar nga Veriu.info, thuhet se pas ankesës së një pacienti Sh.M. është gjetur se “American Hospital Kosova” ka ushtruar kundërligjshëm veprimtarinë mjekësore të infektologjisë, pasi që të njëjtën nuk e kishte të lajmëruar në Divizionin për Licencim dhe Akreditim të Ministrisë së Shëndetësisë, sikurse që as Dr. Murat Mehmeti nuk ishte i lajmëruar nga DLA, që nënkupton se ka punuar kundërligjshëm në këtë spital privat.
Në bazë të këtyre të gjeturave, Inspektorati i Ministrisë së Shëndetësisë e ka gjobitur me një gjobë simbolike prej 1 mijë euro spitalin “American Hospital Kosova”, e cila nësë paguhet brenda 15 ditësh spitali lirohet nga 50% e gjobës.
Në raportin e inspektimit nr, 05-942 të datës 17.06.2025 të hartuar nga inspektorja e Mevlyde Avdiu, thuhet se inspektimi është realizuar pas ankesës së pacientit Sh.M., i cili ishte trajtuar në “American Hospital Kosova” dhe kishte marrë trajtim postoperativ, që nënkupton trajtimin që merr një pacient pas një ndërhyrje kirurgjike.
Vajza e pacientit Sh.M. ishte ankuar për shkak të shqetësimeve lidhur me diagnostifikimin, trajtimin dhe menaxhimin mjekësor të gjendjes së tij pas një ndërhyrje kirurgjikale në spitalin “American Hospital Kosova”, ku i ishte nënshtruar një operacioni për heqjen e veshkës së majtë për shkak të tumorit.
Sipas saj, deri në momentin e ndërhyrjes kirurgjike, babai i saj nuk kishte pasur kurrë probleme me testikujt, por që dy ditë pas ndërhyrjes kirurgjike në “American Hospital Kosova” atij i janë paraqitur enjtje dhe dhimbje në testisin e majtë.
Në ankesë thotë se Dr. Ajet Xhafa i kishte thënë se kjo gjendje e babait të saj kërkon ndërhyrje kirurgjike 4-6 orë nga shfaqja e simptomave, por që i njëjti mjek më vonë i kishte kumtuar informacionin se nuk do të bëhet ndërhyrje kirurgjike, por që do të përcillet gjendja e pacientit përmes trajtimit me terapi (antibiotik).
“Mjeku në fjalë ka deklaruar se për shkak të moshës 68-vjeçare të babait tim dhe mungesës së rëndësisë për fertilitet, nuk ka qenë e nevojshme të operohej, gjë që konsiderojmë si qasje diskriminuese, joprofesionale dhe potencialisht neglizhuese ndaj të drejtave të pacientit”, thuhet në ankesën e saj.
Pas grumbullimit dhe analizimit të dokumentacionit gjatë inspektimit të kryer në “American Hospital Kosova”, Inspektorati ka përcjellë lëndën për shqyrtim profesional në Odën e Mjekëve të Kosovës për dhënien e mendimit-shqyrtimit profesional sipas ligjit për Dr. Faruk Dogan – specialist i urologjisë, Dr. Ajet Xhafa – specialist i urologjisë dhe Agron Beqiri – specialist i urologjisë lidhur me trajtimin e pacientit Sh.M.
Me rastin e inspektimit janë nxjerrë edhe konstatimet nga inspektorët e MSh, ku është gjetur se më datë 14.04.2025 pacienti Sh.M. është liruar për në shtëpi në gjendje të përmirësuar dhe me terapi orale, ku raporti mjekësor është lëshuar nga Dr. Murat Mehmeti- specialist i Infektologjisë, i cili nuk ishte e lajmëruar në DLA/ MSh si pjesë e personelit të këtij institucioni dhe po ashtu nuk është i lajmëruar as shërbimi i Infektologjisë në këtë institucion.
Për shkak të këtyre shkeljeve të veprimtarisë me mjek dhe shërbim ilegal, Inspektorati Shëndetësor ka nxjerrë rekomandim që Dr. Murat Mehmeti t’i ndalohet ofrimi i shërbimeve e në “American Hospital Kosova SHPK” deri në lajmërim dhe licencim në sistemin online të DLA në Ministrinë e Shëndetësisë.
Veriu.info ka raportuar edhe për një skandal tjetër të spitalit tjetër privat “American Hospital Kosova II” – me themelues Klodian Allajbeu, në të cilin ishin gjetur mjekë nga Turqia duke punuar ilegalisht aty.
LEXONI EDHE:
