Deputeti i Lidhjes Demokratike të Kosovës, Arben Gashi, ka reaguar ashpër ndaj mungesës së debatit në Kuvendin e Kosovës, duke e quajtur situatën “parlamentarizëm të çuditshëm” dhe duke ironizuar me faktin që, sipas tij, deputetëve po u ndalohet fjala nën arsyetimin e rregullores së Kuvendit.
Në një postim në Facebook, Gashi ka ngritur shqetësimin se për zgjedhjen e kryetarit të Kuvendit nuk po lejohet asnjë debat, duke shtuar se kjo heshtje e organizuar është shenjë e frikës nga përballja me realitetin politik.
“Na thuhet se ‘rregullorja nuk lejon debat për zgjedhjen e kryetarit të Kuvendit’. Po kush e ndalon debatin për gjendjen politike? Kush e ndalon idenë? Apo ndoshta frika nga fjala është bërë më e madhe se vetë kriza?”, ka shkruar ai.
Gashi ka rikujtuar vitin 2014, kur si pjesë e koalicionit VLAN me Vetëvendosjen, ai dhe kolegët e tij merrnin fjalën për të kërkuar zgjidhje dhe për të ballafaquar ide. Sipas tij, ndryshimi është i thellë në krahasim me heshtjen e sotme në Kuvend.
“Kuvendi është për debat. Për ide. Për zgjidhje. Jo për teatrin e heshtjes me regji ditore politike,” ka përfunduar Gashi.
Deklarata e tij vjen në një moment tensioni institucional dhe paqartësie politike, ku ende nuk është zgjedhur kryetari i Kuvendit dhe janë shfaqur dallime të thella ndërmjet partive politike.
