As në vazhdimin e 44-të, deputetët nuk e konstituan Kuvendin e Kosovës, të dalë nga zgjedhjet e 9 shkurtit.
Edhe më tej nuk ka pajtueshmëri midis Lëvizjes Vetëvendosje në njërën anë dhe partive të tjera në anën tjetër, për formimin e një komisioni për votim të fshehtë të kandidates për kryetare të Kuvendit, Albulena Haxhiu.
Seanca zgjati sërish vetëm pak minuta dhe kryesuesi i seancës, Avni Dehari, i ftoi deputetët të mblidhen sërish pas 48 orësh, më 11 korrik.
Në sallë ishin 101 deputetë. Prej tyre, 55 votuan për.
Deputeti i PDK-së, Artan Behrami, mori fjalën kur kryesuesi Avni Dehari ftoi partinë më të madhe opozitare ta propozojë një deputet për komision.
Behrami bëri thirrje të respektohet aktgjykimi i Kushtetueses dhe të kthehet në votim të hapur.
Fjala e tij u ndërpre menjëherë.
Edhe deputeti i LDK-së, Paris Guri, u përpoq të fliste, por pati ndërhyrje nga deputetët e Vetëvendosjes.
Ai vazhdimisht i kërkonte Fitore Pacollit “t’i kthejë 200 mijë euro që i ka vjedhur”.
Ndërsa, deputetja e AAK-së, Time Kadrijaj, u shpreh se Albin Kurti duhet ta zhbllokoj situatën.
Basha: Ofruam marrëveshje politike, votim të hapur, votim të fshehtë, thanë që nuk duan
Deputeti i Lëvizjes Vetëvendosje, Dimal Basha, tha se deputetët e opozitës po e shkelin rregulloren për debat në seancë konstituive.
“Gjykata Kushtetuese në aktgjykimin e saj tha se deputetët duhet të jenë prezent që të votojnë apo të abstenojnë, duke ua lënë dy forma të votimit, atë të fshehtë dhe të hapur.
Të njëjtit vazhdojnë të mbajnë qëndrime përkundër vendimit të Kushtetueses.
Ka qenë oferta për marrëveshje teknike, po këta thanë nuk duan, ofruam marrëveshje politike, votim të hapur, votim të fshehtë, thanë që nuk duan. Është e papranueshme që po e mbajnë të ngujuar këtë proces”, tha Basha.
Deliu: Nuk pres reflektim të Vetëvendosjes
Deputetja e PDK-së, Blerta Deliu-Kodra, tha se nuk pret reflektim, pasi sipas saj, qasja e Vetëvendosjes është e njëjtë, raporton Ekonomia Online.
“PDK-ja do ta respektoj aktgjykimin e Gjykatës Kushtetuese. Tashmë kemi deponuar në Gjykatën Kushtetuese edhe disa vërejtje të tjera për shkak të mosrespektimit të këtij aktgjykimi, po presim përgjigje. Nuk pres që sot të ketë reflektim, është po e njëjta qasje e marrjes peng të kuvendit”, tha ajo.
Xhaferi: Të qetësohemi politikisht dhe të kthehemi në një situatë normale
Deputeti i LDK-së, Krenar Xhaferi, bëri thirrje për kthim në normalitet politik dhe për konstituimin e Kuvendit të Kosovës, raporton Ekonomia Online.
“Këtë kryeneçësi politike po e përjetojmë të gjithë. Situata është shumë e thjeshtë: ose kthehemi te votimi i hapur fillestar, ose te një qeverisje e unitetit, atë që e ka propozuar LDK-ja, që të qetësohemi politikisht, për periudhë 7-8 muajsh deri në zgjedhjet e reja, të dalim nga ky ngërç politik. Të kthehemi në një situatë normale politike”, shtoi ai.
Haradinaj: Kurti e ka ndarë mendjen për t’i bërë keq Kosovës
Kryetari i AAK-së, Ramush Haradinaj, tha se Albin Kurti dhe Vetëvendosja po e mbajnë peng shtetin. Ai shtoi se Kurti e ka ndarë mendjen për t’i bërë keq Kosovës.
“Ne jemi peng i Vetëvendosjes dhe Kurtit. Ai nuk e ka shumicën politike, nuk dëshiron me ta bëjë. Komisioni për votim të fshehtë u bë pa dakordim të kuvendit. Edhe presidentja tha: kërkojmë të kthehemi në kushtetueshmëri. Jemi peng i tij. Ai e ka ndarë mendjen të bëjë keq për Kosovën. Nuk ka nevojë për mocion, këta mund vetëm të tërhiqen”, u shpreh kreu i AAK-së.
Limaj: Zgjidhja është politike
Kryetari i Nismës Socialdemokrate, Fatmir Limaj, se zgjidhja për për ngërçin politik është politike, raporton Ekonomia Online.
“Besoj se pas konsumimit të interpretimeve të shumëllojta të aktgjykimit të Gjykatës Kushtetuese, njerëzit janë kthyer dhe e kanë parë se kjo çështje është ashtu siç ka qenë nga fillimi, zgjidhja është politike, përmes marrëveshjes. Rrugë tjetër nuk ka.
Kam komunikuar me presidenten, do të kemi edhe takime të tjera.
Në këtë fazë roli i presidentes është i kufizuar, përveç vullnetit të mirë, apelit të saj që në një tryezë politike të gjendet zgjidhja, në këtë fazë po e kryen atë që duhet ta kryejë: konsultimet”, tha Limaj.
