Zyra Kombëtare e Auditimit në raportin vjetor për vitin 2024, ka konstatuar shkelje në dhënien e subvencioneve në komunën e Suharekës që udhëhiqet nga Bali Muharremaj.
Raporti evidenton mosrespektim të kritereve të përcaktuara në thirrjen publike për subvencionimin e fermerëve me serra në bujqësi. Sipas raportit, në thirrjen për aplikim për subvencione nga Drejtoria e Bujqësisë, ndër kriteret e kërkuara për aplikim ishte edhe kërkesa që aplikantët duhej të posedojë tokë bujqësore së paku 0.5ha. Por, raporti thekson se ka evidentuar se së paku pesë përfitues nuk kishin ofruar dëshmi që tregon se kanë në posedim së paku 0.5ha tokë bujqësore.
Kjo theksohet se kishte ndodhur si rezultat i mospërgjegjshmërisë së komisionit të vlerësimit i cili kishte vendosur për aprovimin e kërkesës jo në përputhje me kriteret e thirrjes.
Auditori rekomandon kryetarin e Komunës të përmirësojë procesin e vlerësimit për dhënien e subvencioneve, duke siguruar që vetëm aplikantët që plotësojnë kriteret të përfitojnë nga subvencionimi.
“Bazuar në thirrjen për aplikim nr. 08-15 të datës 26.02.2024 nga Drejtoria e Bujqësisë për subvencionimin e ndërtimit të serave në Komunën e Suharekës, ndër kriteret e kërkuara për aplikim ishte edhe kërkesa që aplikantët duhej të posedojë tokë bujqësore së paku 0.5ha. Ne kemi vërejtur se pesë (5) përfitues të serave nuk kishin ofruar dëshmi që tregon se kanë në posedim së paku 0.5ha tokë bujqësore. Kjo kishte ndodhur si rezultat i mospërgjegjshmërisë së komisionit të vlerësimit i cili kishte vendosur për aprovimin e kërkesës jo në përputhje me kriteret e thirrjes. Subvencionimi jo në përputhje me thirrjen publike, ndikon negativisht tek aplikuesit tjerë mbi transparencën e procesit të ndarjes së subvencioneve. Kryetari duhet të përmirësojë procesin e vlerësimit për dhënien e subvencioneve, duke siguruar që vetëm aplikantët që plotësojnë kriteret të përfitojnë nga subvencionimi”, thuhet në raport. /Reporteri.net/
