Ish kryetari i Mitrovicës dhe ish deputeti, Agim Bahtiri ka pritur në konakun e tij disa përkrahës, të cilët i kanë dhënë mbështetje për zgjedhjet e 28 dhjetorit.
Veriu.info ka siguruar një video të publikuar në Facebook nga një pjesëmarrës në takim, ku ndër të tjera diskutohet edhe për zgjedhjet lokale për kryetar të Mitrovicës, të cilat në balotazh i ka fituar kandidati i LVV-GUXO, Faton Peci.
Bahtiri iu thotë përkrahëve se e ka parë rezistencë për votimin e Faton Pecit dhe se iu ka dashtë t’i jep zor për me fitu.
“Unë e pashë pak problem çështjen e kryetarit aktual, e pash një rezistencë bukur të madhe bre që s’e kom prit. Mu duft shumë me i dhanë zor une, për me u mujt me u kry, që unë s’e kom prit fare hiç që ka me kanë najfar problem”, dëgjohet duke thënë Agim Bahtiri.
Deklarimin e Bahtirit se iu është dashur ta ndihmoj Faton Pecin në momente vendimtare për të fituar, e mbështet edhe njëri prej përkrahësve të tij në takim.
“Valla mos t’u çojshi ju kohën e fundit me i dhezë motorat, ai hupi sikuse Isa Mustafa që thojke me duar në xhepa e marrë Prishtinën”, thotë përkrahësi i Agim Bahtirit.
Video live e takimit e publikuar në Facebook përfundon me deklarimin e Bahtirit: “Qikjo po më befason mu se çka është t’u ndodh”.
