Shefja e Grupit Parlamentar të LDK-së, Hykmete Bajrami, tha se është e qartë që Albin Kurti nuk i ka numrat për të formuar Qeverinë e Kosovës, prandaj edhe po ndodh kjo sagë me zgjedhjen e nënkryetarit të pestë të Kuvendit.
“Lidhja Demokratike e Kosovës, siç e dini, që nga dita e parë ka refuzuar të marrë pjesë në votimin ndaras, për arsye se është e qartë, tashmë edhe në pikën 4 të vendimit të fundit të Gjykatës Kushtetuese, ku ne urdhërohemi të vazhdojmë me konstituimin e Kuvendit sipas agjendës së dakorduar më 8 prill, ku kanë qenë të përfaqësuara të gjitha partitë parlamentare. Takimi ishte thirrur nga ish-kryetari i Kuvendit, z. Glauk Konjufca, dhe kishte një agjendë të dakorduar,” ka thënë ajo pas seancës së sotme.
“Më lejoni t’ju them se tashmë kemi konfirmimet se ekziston edhe procesverbali, ku në këtë seancë partitë politike janë pajtuar që nënkryetarët të votohen në pako. Është rënë dakord që të shkohet në votim të hapur – gjë që më vonë është konfirmuar edhe nga Gjykata Kushtetuese në dy vendime radhazi. Është diskutuar po ashtu që edhe votimet për nënkryetarët e Kuvendit të bëhen në mënyrë të hapur.”
“Ju e keni parë tentativën, e shohim të gjithë qartë: kush është bllokuesi. Sot, pas kaq shumë ditësh prej zgjedhjeve të 9 shkurtit, jemi ende në një situatë ku institucionet janë të pakonstituuara. Është e qartë që Albin Kurti nuk i ka numrat për të formuar Qeverinë, dhe kjo është arsyeja pse ai po vazhdon me një bllokadë të tillë që po e mban peng të gjithë vendin.”
