Pas publikimit të një skandali me prona në Komunën e Suharekës, kryetarit të kësaj komune, Bali Muharremaj, i del në pah edhe një tjetër rast i dyshimtë që lidhet me familjarët e tij.
Gazeta Online Reporteri ka zbuluar se vëllai i kryetarit, Reshat Muharremaj, dhe nipi i tij, Edon Muharremaj, po ndërtojnë një objekt afaristo-banesor në qytet, në tokë komunale që është dhënë në shfrytëzim për 99 vjet.
Në gusht të vitit 2024, Komuna e Suharekës publikoi një ftesë për konkurrim për dhënien në shfrytëzim të një prone komunale me qëllim ndërtimi të një objekti afaristo-banesor.
Në këtë garë, sipas dokumenteve, fillimisht aplikuan katër ofertues, por deri në afatin e fundit formularët i dorëzuan vetëm tre. Në fund, prona iu dha në shfrytëzim investitorit Visar Basha.
Megjithatë, kur erdhi momenti i investimit, në projekt u përfshi kompania “EM Invest Group” SH.P.K., që është në pronësi të Edon Muharremajt, djalit të vëllait të kryetarit. Vëllai i kryetarit Muharremaj, Reshati, është gjithashtu pronar në këtë kompani.
Ndërtimi, sipas hulumtimit të gazetës online Reporteri.net, po zhvillohet pjesërisht në tokë komunale dhe pjesërisht në pronë private. Leja ndërtimore, ndërkohë, është dhënë me vonesë – pasi punimet kishin filluar.
Ndërtimi, sipas hulumtimit të gazetës online Reporteri.net, po zhvillohet pjesërisht në tokë komunale dhe pjesërisht në pronë private. Leja ndërtimore, ndërkohë, është dhënë me vonesë – pasi punimet kishin filluar.
Sipas marrëveshjes, Komuna e Suharekës përfiton 27 për qind të hapësirës së ndërtuar, apo rreth 430 metra katrorë banesa si kompensim.
Kjo ka ngritur dyshime për favorizim dhe trajtim të privilegjuar në këtë rast.
Kryetari i Suharekës, Bali Muharremaj, ka mohuar çdo shkelje ligjore, duke thënë se gjithçka është bërë në mënyrë transparente dhe sipas procedurave zyrtare.
“Po more, ajo është zyrtare dhe ligjore. Komuna i ka marrë 430 metra banesë kompensim. Edoni është qytetar i këtij vendi, s’ka asgjë të keqe këtu,” – ka deklaruar Muharremaj për Reporteri.net.
Nga ana tjetër, Edon Muharremaj ka reaguar ashpër ndaj interesimit të mediumit, duke refuzuar t’u përgjigjet pyetjeve rreth marrëveshjes me Visar Bashën.
“Është mirë me u informu shumë mirë para se me më shqetësu. Ti s’ki të drejtë me më bë pyetje të tilla. Ta jap numrin e avokatit – pyet përmes emailit. Të ka pagu dikush, por shumë lirë,” – tha ai, duke shtuar se nuk ka pasur asnjë marrëveshje paraprake me investitorin Basha.
Për këtë rast ka reaguar edhe asamblisti i LDK-së në Kuvendin Komunal, Selman Kolgeci, i cili ka thënë se çështja është diskutuar tri herë në Asamble dhe është kundërshtuar nga opozita.
“Në seancën e parë u shpall interesi publik, e në të tretën u votua kontrata. Ne e kemi kundërshtuar, sepse prona është dhënë me 27 për qind në vend se me 33 ose 35 për qind. Kemi menduar se është abuzuar me pronën publike,” – deklaroi Kolgeci.
Ai shtoi se punimet kanë filluar pa leje ndërtimore, duke theksuar se “podrumi është hapur para se të lëshohej leja”.
“Kemi mbrojtur interesin e qytetarëve, sepse është shqetësuese kur prona publike nuk vlerësohet me vlerën reale që ka,” – tha ai.
Investitori Visar Basha, në emër të të cilit është dhënë prona komunale, nuk është përgjigjur në thirrjet e Reporteri.net.
