Duda Balje nga Bashkimi Social Demokrat (SDU), dhe Veton Berisha nga Partia Liberale Egjiptiane (PLE), kanë thënë se nuk kanë dhënë një konfirmim ndaj kryeministrit në detyrë, Albin Kurti, nëse do ta mbështesin për një mandat të tretë.
Sipas tyre, kryeministri nuk ka konfirmuar ende nëse do të plotësojë kërkesat që ata kanë për komunitetet që përfaqësojnë, boshnjakët dhe egjiptianët.
Si Balje, ashtu edhe Berisha, kanë lënë mundësinë të hapur për një marrëveshje në takimet që do të zhvillohen para seancës konstituive të Kuvendit, e cila pritet të mbahet më 15 prill.
Të dy liderët janë takuar gjithashtu me opozitën, me të cilën kanë diskutuar kërkesa të ngjashme.
Pas takimit me kryeministrin, Balje ka thënë: “Sot u takova me kryeministrin dhe i parashtrova kërkesat që kemi si boshnjakë. Nuk kemi marrë konfirmim dhe as nuk kemi dhënë konfirmim. Ky ishte takimi i parë dhe jemi në fazën e bisedimeve”.
Balje ka kërkuar krijimin e një komune boshnjake, reforma në arsim dhe trajtim të barabartë për komunitetin boshnjak, njësoj si partitë tjera që kanë një deputet në Kuvend.
Ndërsa, Berisha ka theksuar se nuk ka vija të kuqe me askënd në Kosovë.
