Mbrëmë në rrugën “Vasilije Ostrovski” në Mitrovicën e Veriut, është hasur një shkrim kërcënues në mur, i adresuar kryeministrit në detyrë të Kosovës, Albin Kurti.
Rasti është raportuar në polici dhe pas konsultimit me prokurorin kujdestar, është iniciuar si kanosje.
Zëvendësdrejtori i Policisë për Rajonin e Veriut, Veton Elshani, ka konfirmuar se aktualisht nuk ka persona të dyshuar apo të arrestuar lidhur me këtë rast.
Për këtë, profesori universitar, Mazllum Baraliu ka deklaruar se kjo gjuhë e kanosjes dhe urrejtjes është e dëmshme dhe e papranueshme për realitetin kosovar.
I ftuar në emisionin “Mesditë” në Tëvë1, Baraliu tha se këto kanosje janë një shpërfaqje e një politike agresive të vazhdueshme nga Beogradi.
Tutje, ai tha se preventiva është metoda më e mirë për ta parandaluar kriminalitetin në Kosovë.
“Kjo gjuhë e kanosjeve, kërcënimeve dhe urrejtjes që qarkullon, adresohet artikulohet qoftë edhe përmes medieve sociale, qoftë në forma të tjera është e dëmshme dhe e papranueshme për realitetin kosovar. Do të duhej që institucionet e vendi të jenë shumë më vigjilente dhe të jenë preventive sepse nuk mund të lihen anash këto kërcënime. Preventiva është metoda më e mirë dhe më efikase e parandalimit të kriminalitetit, pra veprave penale aq më tepër se këto janë më shumë se kaq, kjo është shpërfaqje e një politike agresive të vazhdueshme në kontiniutet nga Beogradi, shumë e errët me metoda me mjete e me njerëz të errët të cilët kanë humbur orientimin në këtë jetë pa e çmuar jetën e tyre duke rrezikuar të tjerët”, ka deklaruar Baraliu.
