Zgjedhja e Dimal Bashës në krye të Kuvendit ka shkaktuar tensione të mëdha mes tri partive ish-opozitare, Partisë Demokratike të Kosovës (PDK), Lidhjes Demokratike të Kosovës (LDK) dhe Aleancës për Ardhmërinë e Kosovës (AAK). Vota pro Bashës nga PDK e AAK ka acaruar LDK-në, e cila u distancua nga ky vendim, ndërsa jo të gjithë deputetët e partive të përfshira mbështetën kandidaturën e Bashës nga VV.
Kryetari i LDK-së, Lumir Abdixhiku, pas përfundimit të seancës, e cilësoi votën e PDK-së dhe AAK-së për Bashën si “gabim trashanik”.
“Sot është shumë e qartë dhe dallimi që kemi me ta, sa i përket respektimi të Kushtetutës dhe përmbajtjes së njerëzve që besojmë se duhet të ju prijnë institucioneve të Kosovës. Ky dallim kristal i qartë, sot u kurorëzua me triumf të injorancës, zërit përqarës dhe ndarës dhe jodinjitetshëm për këtë institucion të Kuvendit por shpresoj që votuesit e partisë së parë të ndihen të përfaqësuar. E ndjej si gabim trashanik votën e dy partive tjera, PDK dhe AAK -së që institucioneve t’u japin një emër të tillë”, tha Abdixhiku.
Reagimi nga kryetari i AAK-së, Ramush Haradinaj, nuk vonoi. Ai i bëri thirrje Abdixhikut t’i thërrasë “mendjes” dhe e fajësoi për bllokimin e institucioneve.
“Vazhdo të vendnumërosh se kjo të shkon për shtati ty, Lumir”, shkroi Haradinaj.
Ai shtoi se AAK e kishte vënë re që vendi po hynte në një bllokadë institucionale dhe kishte dërguar kërkesën për interpretim në Gjykatën Kushtetuese, duke mbështetur vendimet e saj për të dalë nga ngërçi.
“Veç Lumir Abdixhiku me të tijët, janë betonuar pro kësaj bllokade. Lumiri ka vendnumëruar në vazhdimësi dhe po vazhdon të vendnumërojë ende”, shtoi Haradinaj.
Ndërkohë, kryetari i PDK-së, Memli Krasniqi, iu drejtua Abdixhikut përmes një studioje televizive.
“Ndonjëherë duhet me kërku dritën. Secila parti duhet me dhënë kontribut. Kanë vendos as andej as këndej se skanë votu asgjë. E kanë pas njëfarë lloj refuzimi. Më e rëndë që kanë refuzu ta bëjnë qeverinë me partitë ish-opozitare. Ka qenë gabim që s’jemi marrë vesh PDK, LDK, AAK”, tha Krasniqi në Rubikon.
Ai po ashtu theksoi se PDK votoi për Bashën për kryetar të Kuvendit për të treguar se nuk kontribuon në bllokadën institucionale.
“Ma shumë se sa për Dimal Bashën apo për individin, ne votuam për të mbajtur premtimin dhe fjalën që u kishim dhënë qytetarëve të Kosovës që Partia Demokratike nuk është kontribuuese në bllokadë, por që brenda kritereve dhe parametrave që ne i kishim vendosur si parti, do të zhbllokojmë situatën dhe do të dalim nga ngërçi politik”, tha Krasniqi.
