Veriu.info në kuadër të serisë së shkrimeve hulumtuese për skandalin e importimit të kafshëve të gjalla në Kosovë, ka gjetur se kompanitë “Bersina” Sh.P.K. dhe “Besi Group 2024” Sh.P.K. nga periudha tetor 2024 deri mars 2025 mbi 1 mijë kafshë të importuara nga jashtë në Kosovë për therje, i kanë zhdukur nga sistemi shtetëror.
Këto kafshë është dashur të dërgohen drejtpërdrejt nga dogana në thertore të licencuara dhe të theren brenda 72 orësh, por kompanitë “Bersina” Sh.P.K. dhe “Besi Group 2024” Sh.P.K. nuk dihet ku i kanë dërguar, përderisa burime të Veriu.info nga AUV bëjnë të ditur se ekziston dyshimi i bazuar që këto kafshë të kenë përfunduar në tregje për shitje si kafshë të gjalla.
Veriu.info ka siguruar vendimet e AUV më të cilat ua kishte pezulluar lejet e importit kompanive “Bersina” Sh.P.K. dhe “Besi Group 2024” Sh.P.K., për shkak të këtyre shkeljeve të rënda ligjore.
Më 28 mars AUV kishte nxjerrë vendim më të cilin kompanisë “Bersina” Sh.P.K. me pronar Baton Berisha, i ka pezulluar lejen e importit të kafshëve të gjalla, pasi që gjatë inspektimit të kryer ka gjetur se kjo kompani në periudhën janar – shkurt 2025 kishte importuar 635 krerë gedhe, të cilat në bazë të vendimeve duhet të thereshin brenda 72 orësh në thertore të licencuar.
Gjatë këtij inspektimi AUV ka gjetur se “Bersina” Sh.P.K. me adresë në Podujevë në thertore tjera të pakontraktuara ka therur 68 krerë gedhe, përderisa 585 prej tyre nuk dihet se ku kanë përfunduar.
Ndërsa, kompania “Besi Group 2024” Sh.P.K. me pronar Feriz Berisha dhe adresë në Mitrovicë gjatë periudhës tetor 2024 deri në mars 2025 ka importuar në Kosovë 586 krerë gedhe, të cilat sipas vendimeve duhet të thereshin brenda 72 orësh.
Por edhe kjo kompani nuk ka vepruar në përputhje me rregullativën ligjore të importit të kafshëve, pasi që 452 kafshë nuk i ka raportuar në sistemin e AUV dhe për pasojë nuk dihet ku kanë përfunduar, për çka drejtori ekzekutiv i AUV ka nxjerrë vendim për pezullimin e lejes së importit për “Besi Group 2024” Sh.P.K. më datë 10 prill 2024.
Mos zbatimi i rregullativës ligjore për therjen e kafshëve të importuara brenda 72 orësh nga kompanitë importuese, shmang kontrollin e inspektorëve të AUV në lidhje me shëndetin e kafshëve dhe hap mundësinë kompanive që ato t’i therin ilegalisht apo t’i shesin, ku për pasojë vjen edhe deri të mundësia e evazionit fiskal dhe rrezikimit të shëndetit të konsumatorëve të mishit./Veriu.info
