Zyrtarë të lartë të Shtëpisë së Bardhë do të takohen me një delegacion kinez në Londër të hënën për raundin e radhës të bisedimeve tregtare, ka njoftuar presidenti amerikan Donald Trump.
Takimi vjen pas një telefonate të enjten mes Trump dhe liderit kinez Xi Jinping, të cilën presidenti amerikan e cilësoi si “shumë pozitive” dhe që zgjati rreth një orë e gjysmë. Duke folur të premten me gazetarët nga Air Force One, Trump tha se ishte një “bisedë e mirë”, duke përshkruar marrëveshjen si “komplekse”, por një që “do të na sjellë shumë para”, raporton Sky News.
Në platformën e tij Truth Social, Trump tha se takimi në Londër “duhet të shkojë shumë mirë” dhe shtoi se sekretari i thesarit Scott Bessent, sekretari i tregtisë Howard Lutnick dhe përfaqësuesi për tregtinë Jamieson Greer do të përfaqësojnë SHBA-në në bisedime. Ende nuk është e qartë kush do ta përfaqësojë Kinën.
Të dy vendet ndodhen në një ngërç për shkak të tarifave dhe një mosmarrëveshjeje që përfshin eksportet e mineraleve të rralla strategjike, ku Kina mbetet prodhuesi kryesor.
Më 12 maj, SHBA dhe Kina arritën një marrëveshje 90-ditore në Gjenevë për të pezulluar tarifat ndëshkuese që u vendosën ndaj njëra-tjetrës që nga inaugurimi i Trump në janar.
Presidenti amerikan e përshkroi këtë veprim si pjesë të një “rivendosjeje të plotë” të marrëdhënieve. Marrëveshja shkaktoi një rritje të ndjeshme në tregjet globale të aksioneve dhe në indeksat amerikanë që ndodheshin në ose pranë niveleve të tregut të rënies.
Sipas marrëveshjes së përkohshme, SHBA uli tarifat nga 145% në 30% për mallrat kineze, ndërsa Kina pranoi të ulte tarifat e saj ndëshkuese nga 125% në 10% për mallrat amerikane. Megjithatë, tarifat specifike për sektorë të caktuar, si taksa 25% për makinat, aluminin dhe çelikun, mbeten ende në fuqi.
Ministria e Jashtme e Kinës tha se ishte presidenti amerikan ai që e nisi telefonatën dhe se ata i kishin kërkuar atij të “hiqte masat negative” që janë në fuqi kundër Kinës.
Po ashtu, sipas Pekinit, Trump tha se “SHBA do të donte të kishte studentë kinezë që vijnë për të studiuar në Amerikë”, pavarësisht se administrata e tij më parë kishte thënë se do t’u anulonte në mënyrë agresive vizat studentëve kinezë.
Që prej rizgjedhjes së Trump, ai ka kërcënuar shpesh me masa ndëshkuese tregtare ndaj partnerëve të SHBA-së, për t’u tërhequr në momentin e fundit.
