Pentagoni po zhvendos bombarduesit strategjikë B-2 mbi Paqësor nga baza ajrore në Missouri, një shenjë që, sipas New York Times, administrata Trump po i vendos ata në pozicion nëse do të jenë të nevojshëm për një sulm ndaj Iranit.
Presidenti Trump pritej të zhvillonte një takim urgjent me Këshillin e Sigurisë Kombëtare të shtunën mbrëma, për të shqyrtuar mundësinë e bashkëngjitjes së ShBA-ve në ofensivën izraelite kundër objekteve bërthamore iraniane.
B-2 mund të mbajnë bombën GBU-57, një armë konvencionale 30,000 paund (13,600 kilogramë) që sipas Wall Street Journal, duke cituar analistët e mbrojtjes, ka potencialin më të madh për të dëmtuar objektin e pasurimit të uraniumit në Fordow të Iranit, shkruan
Trump e ka bërë të qartë se po shqyrton nëse Shtetet e Bashkuara duhet të bashkohen me përpjekjet e Izraelit për të kufizuar aftësinë e Iranit për të siguruar një armë bërthamore.
Megjithatë, ai gjithashtu i ka dhënë vetes më shumë kohë për të vendosur se çfarë do të bëjë. Karoline Leavitt, sekretarja për shtyp e Shtëpisë së Bardhë, u tha gazetarëve të mërkurën se presidenti do të marrë një vendim brenda dy javëve të ardhshme, ndërsa i jep Iranit edhe një shans për të hyrë në bisedime.
Paraditës e së shtunës, Izraeli ndërmori një valë të re sulmesh ajrore ndaj sistemeve raketore dhe një objekti bërthamor në territorin iranian. Në kundërpërgjigje, Irani lëshoi raketa balistike dhe nisi dronë drejt territorit izraelit.
Izraeli pretendon se ka vrarë tre komandantë të Gardës Revolucionare Iraniane. Megjithatë, pavarësisht sulmeve intensive, disa nga objektet më të mbrojtura të Iranit, përfshirë Fordon, mbeten ende funksionale.
Ministri i Jashtëm izraelit, Gideon Saar, deklaroi se fushata e tanishme ajrore e ka vonuar Iranin me dy deri në tre vite në përpjekjen për të ndërtuar një armë bërthamore. Ai tha gjithashtu se bashkëpunimi i mundshëm me ShBA-në do të ishte vendimtar për shkatërrimin e plotë të këtyre kapaciteteve.
Nga ana tjetër, Irani ka paralajmëruar ashpër kundër përfshirjes amerikane në konflikt. Ministri i Jashtëm iranian u shpreh se një hap i tillë do të ishte “jashtëzakonisht i rrezikshëm për të gjithë rajonin”.
