Bordi i Drejtorëve i ndërmarrjes publike të Ujësjellësit “KRU Mitrovica” ka zgjedhur Kryeshefin e ri Ekzekutiv, në bazë të konkursit të shpallur në muajin korrik.
Veriu.info ka siguruar vendimin e Bordit të Drejtorëve të “KRU Mitrovica”, në të cilin thuhet se Kryeshef Ekzekutiv është zgjedhur Bashkim Kurti.
Ai vetëm nga ana formale mund të quhet Kryeshef Ekzekutiv i ri, pasi që ai ka të kaluar në po të njëjtën pozitë në “KRU Mitrovica”.
Bashkim Kurti për herë të parë Kryeshef Ekzekutiv i Kompanisë Rajonale të Ujësjellësit “Mitrovica” ishte zgjedhur në nëntor të vitit 2021, pozitë të cilën e kishte mbajtur rreth dy vite.
Kurti kishte dhënë dorëheqje nga po kjo pozitë, pasi që ishte zgjedhur Kryeshef i ndërmarrjes “Trepça” në janar të këtij viti.
Mirëpo, në fund të korrikut 2024, Gjykata Themelore e Mitrovicës kishte anuluar konkursin për Kryeshef të Trepçës dhe për pasojë Bordi i Drejtorëve i ndërmarrjes “Trepça” ishte detyruar të liroj nga detyra Bashkim Kurtin.
Por si duket Bordet e Drejtorëve të emëruar nga Qeveria Kurti në ndërmarrjet publike që veprojnë në Mitrovicë, janë kthyer në shërbim total të Bashkim Kurtit, duke e zgjedhur sa herë të konkuron e ku të konkuron.
Pas dorëheqjes së Bashkim Kurtit në janar 2024 nga pozita e Kryeshefit të Kompanisë Rajonale të Ujësjellësit “Mitrovica”, Bordi i Drejtorëve i kësaj ndërmarrje me në krye Kryesuesen Kumrije Kelmendi kishte shpallur dy herë konkurse, të cilat më pas i kishte anuluar.
Ky Bord i Drejtorëve i emëruar nga Qeveria e Kosovës e udhëhequr nga Albin Kurti, tek në konkursin e tretë e zgjedhi Kryeshefin Ekzekutiv, dhe si për ironi e zgjodhi pikërisht Kryeshefin që kishte dhënë dorëheqje disa muaj më parë, ku si pasojë e kësaj dorëheqje ishin shpallur tre konkurse deri në rizgjedhjen e tij.
