Analisti politik Burim Ramadani ka reaguar ashpër ndaj artikullit anti‑UÇK, të përbashkët me kryetarin e ri të Kuvendit, deputetin e VV-së, Dimal Basha, dhe propagandistes Jana Arsovska. Ramadani e përshkroi artikullin si pjesë e “luftës hibride” që po zhvillohet ndaj institucioneve të shtetit dhe vlerave kombëtare.
“S’po ju dëgjohet zëri rreth propagandistes agresive Jana Arsovska?”, shkroi ai, duke kërkuar reagim urgjent nga institucionet.
“Lufta hibride nga Jana Arsovska dhe të ngjashmit e saj duhet të marrë goditje shtetërore të menjëhershme!”, u shpreh tutje.
Ramadani theksoi se çdo reagim shtetëror duhet të kalojë përtej motiveve politike, grupore apo partiake dhe të mbrohet Patrimonia Kombëtare. Ai propozoi haptazi disa masa drastike:
“Jana Arsovska DUHET të shpallet sa më shpejt Persona Non Grata!”
“Bashkëpunëtorët e saj DUHET të largohen përjetësisht nga skena publike shqiptare!”
Analisti bëri një paralajmërim të qartë:
“Me Sigurinë Kombëtare nuk bëhet lojë! Ajo nuk duhet të trajtohet varësisht nga konformiteti i pushtetit! Mos harroni: Në Siguri Kombëtare përgjegjësia është aq e madhe sa që edhe mosdija është tradhëti!”
Ramadani i bëri këto deklarata për të vënë në pah shqetësimin për ndikimin e retorikës politike dhe fuqinë që sjell udhëheqja institucionale në kushtet e tensioneve mes besimit në luftën e UÇK-së dhe sfidave politike në zhvillim./lajmi.net/
