Doarsa Gjonbalaj, bashkëshortja e aktivistit të Lëvizjes Vetëvendosje, Besnik Zeqiraj, është punësuar në një pozitë të lartë në Agjencinë Kosovare të Privatizimit (AKP), vetëm pak kohë pasi Zeqiraj u emërua në krye të ndërmarrjes publike ‘Hidrodrini’.
Gazeta Insajderi nga burime të sigurta ka mësuar se gruaja e aktivistit të motmotshëm të Lëvizjes Vetëvendosje, Doarsa Gjonbalaj, është punësuar me një pozitë në AKP.
Foto e përbashkët e Doarsa Gjonbalaj me bashkëshortin Besnik Zeqiraj:
Insajderi mëson se ajo është caktuar për detyrën: Udhëheqëse e Zyrës Rajonale në Pejë.
Bashkëshortja e Besnik Zeqirajt, tanimë ka marrë edhe rrogën e parë nga thesari i shtetit.
Gazeta Insajderi ka dërguar pyetje në Agjencinë Kosovare të Privatizmit, se a ka pas ndonjë konflikt interesi në punësimin e Gjonbalajt, mirëpo deri në publikimin e këtij teksti, nuk ka kthyer ndonjë përgjigje.
Insajderi poashtu i ka dërguar pyetje edhe burrit të Gjonbalajt, Besnik Zeqirajt, mirëpo i njëjti, deri në publikimin e këtij teksti, nuk ka kthyer ndonjë përgjigje.
Insajderi para disa ditëve ka raportuar se Besnik Zeqiraj, aktivist i motmotshëm Lëvizjes Vetëvendosje, do ta mbajë një nga postet më të rëndësishme të ndërmarrjes publike ‘KRU Drini’.
Atë të ushtruesit të detyrës së kryeshefit ekzekutiv. Kjo, pas shkarkimit të Dri Cenës për përformancë të dobët nga ana e bordit të ndërmarrjes. Zeqiraj ishte i dënuar me gjashtë muaj burgim nga Gjykata Themelore në Pejë për djegien e një veture zyrtare.
Gazeta Insajderi raportoi ekskluzivisht për shkarkimin e Dri Cenës nga pozita e kryeshefit ekzekutiv përgjatë ditës së sotme për “mungesë përvoje” dhe mos-reflektim.
“Pas vlerësimit negativ të performancës që BDI bën KE për punën provuese 6 mujore në dhjetor të vitit 2024, atij i zgjatet kontrata e punës me qëllim që të reflektojë dhe të përmirësojë sjelljen e tij udhëheqëse. Bordi këtë vendim e arsyetoi se KE ka mungesë përvoje në udhëheqje të ndermarrjeve publike”, thuhet ndër të tjera në vendimin që e ka parë Insajderi.
Insajderi po ashtu ka siguruar vendimin që dëshmon emërimin e Besnik Zeqirajt, aktivistit të kamotshëm të VV’së, në pozitën e ushtruesit të detyrës së kryeshefit ekzekutiv të ‘KRU Hidrodrini’.
“Bordi i Drejtorëve duke u bazuar në kompetencat sipas dispozitave të aplikueshme të Ligjit Nr.03/L- 087 mbi Ndërmarrjet Publike pas shkarkimit nga detyra e Kryeshefit Ekzekutiv z.Dri Cena DT. 31.07.2024, emëron z.Besnik Zeqiraj ushtrues të detyrës së Kryeshefit Ekzekutiv në KRU’Hidrodrini” Sh. A. Pejë, i emëruari do ta ushtroj këtë pozitë me efekt nga dt.31.07.2024 me të gjitha kompetencat ligjore dhe statutare të Kryeshefit Ekzekutiv deri në përzgjedhjen e Kryeshefit Ekzekutiv pas përfundimit të procedurave të konkursit publik”, thuhet në vendim.
Gjykata Themelore në Pejë kishte dënuar më 2017-ën aktivistin e VV’së nga Peja, Besnik Zeqirajn, me 6 muaj burg.
Ai akuzohej se në dhjetorin e vitit 2015 i kishte vënë zjarrin një makine të Gjykatës për Kundërvajtje, së bashku me një person tjetër.
Zeqiraj një kohë e ka mbajtur edhe pozitën e sekretarit organizativ të Vetëvendosjes.
Ai kishte kandiduar edhe si deputet në zgjedhjet parlamentare nga radhët e Lëvizjes Vetëvendosje.
Insajderi kishte raportuar vitin që shkoi për përzgjedhjen e Zeqirajt në pozitën e zyrtarit financiar në ‘KRU Hidrodrini’.
Sipas ligjit kjo ndërmarrje publike është nën Ministrinë e Zhvillimit Ekonomik. Ministri kjo që udhëhiqet nga bashkëpartiakia e të përzgjedhurit Zeqiraj, Artane Rizvanolli.
