Ashtu si viti 2020, edhe ky vit nuk ishte më i miri i mundshëm për Përfaqësuesen e Kosovës. “Dardanët” zhvilluan tetë ndeshje eliminatore për Kupën e Botës “Katar 2022”, si dhe gjashtë miqësore, derisa rezultatet nuk kanë qenë aspak bindëse.
“Dardanët” e drejtuar nga ish-trajneri Bernard Challandes kanë pasur një kampanjë zhgënjyese në eliminatoret e botërorit në vitin që lamë pas, raporton FrontOnline.
Nga tetë ndeshje të zhvilluara, Kosova ka regjistruar vetëm një fitore kundër Gjeorgjisë 0:1 në Tblisi, derisa ka arritur të barazojë me Greqinë dy herë (1:1).
Kurse, sa i përket humbjeve, Kosova i pësoi pesë sosh në këtë kampanjë – dy humbje nga Spanja, dy nga Suedia si dhe një nga Gjeorgjia (1:2).
Pamundësia për të arritur në Kupën e Botës që mbahet vitin e ardhshëm në Katar bëri që Federata e Futbollit e Kosovës ta shkarkojë zviceranin Bernard Challandes.
Viti i miqësoreve
Përpos tetë ndeshjeve zyrtare, “Dardanët” zhvilluan gjashtë ndeshje miqësore me kombëtare si Lituania, San Maria, Malta, Guinea, Gambia dhe Jordania.
Në këto gjashtë ndeshje, tanët fituan vetëm katër sosh, derisa u mposhtën nga Guinea (1:2) dhe Jordania (0:2).
Drejt FFK-së kishte kritika të ashpëra për këto miqësore me pretekstin se kanë aranzhuar ndeshje të tilla për t’i fshehur rezultatet zhgënjyese
Prurjet e pakta
Përkundër se vit pas viti, drejtuesit e Federatës së Futbollit të Kosovës japin premtime për risi në Përfaqësuesen e Kosovës, një gjë e tillë duket se nuk po ndodhë.
Në vitin 2021, Kosovës iu bashkuan vetëm Emir Sahiti, Astrit Selmani dhe Toni Domgjoni, megjithatë vëmendja ishte krejt diku tjetër.
Elvis Rexhbeçaj, Mërgim Berisha dhe Andi Zeqiri pritej ta vishnin fanellën e “Dardanëve”, por ende jo.
Madje, Zeqiri edhe pse kishte pozuar me fanellën e Kosovës, ka ndryshuar mendjen dhe ka pranuar ftesën e Zvicrës, përfaqësuese me të cilën ka zhvilluar edhe disa ndeshje zyrtare.
Ndërkaq, Berisha dhe Rexhbeçaj zyrtarisht ende nuk kanë vendosur në këtë drejtim.
Shkarkimi i Challandesit
Pas një periudhe prej më shumë se tre vjet, aventura e Bernard Challandesit te Përfaqësuesja e Kosovës u mbyll në muajin tetor.
Në tre vjet e gjysmë, trajneri zviceran drejtoi Kosovën drejt ambicieve të mëdha në 37 ndeshje.
Në këto ndeshje, Kosova nën drejtimin e Challandesit regjistroi 16 fitore, tetë barazime dhe 13 humbje, ku 67 futbollistë i kishte përdorur në formacionet e tij.
Presioni ndaj FFK-së për ta shkarkuar Challandesin erdhi pas humbjeve të njëpasnjëshme dhe rezultateve zhgënjyese këtë edicion.
Me Challandesin, Kosova kishte shkëlqyer në debutim në Ligën e Kombeve, ku kishte fituar edhe grupin përkatës.
Pas shkarkimit të zviceranit, Kosovën e drejtoi në ndeshjet e mbetura të këtij viti slloveni Primoz Gliha, i cili nuk është se u tregua i suksesshëm.
Trajneri i ri – Felix Magath apo Marco van Basten?
Që prej shkarkimit të Challandesit, në media janë përhapur shumë spekulime në lidhje me pasardhësin e zviceranit te Përfaqësuesja e Kosovës.
Shumë emra të njohur të futbollit botëror janë përmendur, por favorit raportohen se janë vetëm dy.
Trajneri gjerman, Felix Magath dhe ish-futbollisti holandez, Marco van Basten janë dy opsionet e preferuara të FFK-së.
Se kush do të jetë trajneri i ri i Kosovës, mbetet të shihet në fillim të vitit 2022.
Dragusha: Shkarkimi i Challandesit vendim i duhur, me trajnerin e ri shpresoj ta arrijmë kualifikimin
Ish-futbollisti i mirënjohur dhe ish-reprezentuesi i Kosovës, Muhamet Dragusha e ka komentuar ecurinë e përfaqësueses në vitin që po lëmë pas.
Fillimisht, ai ka folur për ecurinë e Bernard Challandesit, trajnerit tashmë të shkarkuar të Kosovës.
“Që nga ardhja e trajnerit Challandes te Kosova, menduam se filloi një epokë e re, e drejtë, korrekte dhe e dashur për sportdashësit, jo që trajneri Albert Bunjaku nuk ishte i duhur, pasi edhe ai në fazën kur u emërua trajner, e bëri të pamundurën që t’i sjell te Kosova lojtarët cilësor”, ka thënë Dragusha për FrontOnline, duke vazhduar:
“Por, Challandes e trashgoi një skuadër që me të vërtetë në fillimet e saj ishte e jashtëzakonshme, disiplina ishte mbi nivel pasi ai donte profesionalizëm në të gjitha aspektet. Fati i tij e përcolli edhe me një garë të re nga UEFA që na mundësuan përmes Ligës së Kombeve një mundësi të dytë kualifikimi dhe ishte fat se ishim në rang me kombëtaret e vogla, por me cilësi më të vogël. Aty ishin hapat e parë të trajnerit me suksese, ku edhe menduam se kualifikimi po ndodhë pasi udhëheqja e trajnerit me staf ishte në nivelin e pritur”, theksoi ai.
Më tutje, Dragusha thotë se për mos kualifikimin, një faj e kanë edhe drejtuesit.
“Ndodhi si ndodhi, pandemia dhe nuk u kualifikuam. Fajet janë në shumë drejtime, por një faj mbetet edhe te drejtuesit që nuk e jetësuam ëndrrën e shumë pritur. Aty ishte edhe kthesa dhe gjërat shkuan keq e më keq, pastaj ndeshjet nuk ishin të menaxhuara mirë, por as të studiuara mirë”, nënvizoi Dragusha.
Ish-futbollisti i disa skuadrave në Kosovë tregon edhe si nisi rënia e “Dardanëve”.
“Filloj të zhduket disiplina e fillimit, ku si pasojë e saj na ikën dy futbollistë te Shqipëria – Dermaku dhe Ismajli, pastaj ishte Paqarada që tha se nuk do të pranojë ftesën derisa të largohet Bernard Challandes. Dhe kështu përfunduam një cikël pa suksese. Prishja e kontratës me Challandesin ishte vendim i duhur i FFK-së dhe shpresoj se trajneri i ardhshëm të nxjerrë maksimumin dhe ta kemi një sistem më
ndryshe të lojës, poashtu sjellje të reja dhe të kompletohemi drejt një kualifikimi në evropian apo botëror”, përfundoi për FrontOnline Muhamet Dragusha.
