Deputetja e Partisë Demokratike të Kosovës, Vlora Çitaku, ka reaguar ashpër ndaj faktit që Martin Berishaj vazhdon të mbajë pozitën e ambasadorit, pavarësisht përfshirjes së tij në afera të dyshuara financiare.
Ajo e ka quajtur këtë situatë “marrëzi pa kufi”, duke akuzuar qeverinë për mungesë përgjegjësie.
Përmes një postimi në rrjete sociale, Çitaku ka thënë se Berishaj është ende në detyrë vetëm sepse, sipas saj, “i shërben liderit suprem”. Ajo ka përmendur se ai e kalon “një ditë në Prokurori, një ditë në Ambasadë”, duke aluduar në përfshirjen e tij në hetime dhe njëkohësisht ruajtjen e pozitës zyrtare.
“Pavarësisht dëshmive publike dhe aferave milionëshe, ai vazhdon të jetë ambasador me fuqi të plotë,” shkroi Çitaku, duke theksuar kontrastin me gjendjen e vështirë ekonomike që po përjetojnë bizneset dhe punëtorët në Kosovë si pasojë e rritjes së çmimeve të energjisë.
