Me urdhër të Prokurorisë Speciale, Policia ka nisur bastisje në katër lokacione mëngjesin e sotëm – mes tyre, edhe në Ministrinë e Bujqësisë.
*Ministri në detyrë i bujqësisë Faton Peci,intervistohet nga Njësia e veçantë e hetimeve kundër korrupsionit
*Kontrata për funksionalizimin e fabrikës për përpunimin e produkteve shtazore – është çështja – dhe peshon 60 milionë euro.
***
Rreth tri javë më parë, gazetari Lirim Mehmetaj kishte publikuar të plotë Kontratën për funksionalizimin e fabrikës për përpunimin e produkteve shtazore’ – kontratë për të cilën, policia – me urdhër të Prokurorisë Speciale kreu disa bastisje sot, përfshirë edhe ato në objektin e Ministrisë së Bujqësisë.
Çka duhet të dini?
Tenderi për funksionalizimin e fabrikës për përpunimin e produkteve shtazore, është ‘përgatitur’ më 18.09.2024 ndërkaq kompania që e ka fituar atë ‘LIP Ks dhe IT ShPK’ – e kishte fituar këtë kontratë derisa e njëjtë ishte regjistruar në ARBK pesë ditë pasi që ishte shpallur tenderi, më saktësisht më 23.09.2024.
Kushtet (problematike)
Në kushtet e kontratës, kërkohet që operatori apo grupi i operatorëve duhet të ketë përvojë në përpunimin e nënprodukteve shtazore, nga të paktën 12 deri në 15 vitë punë. Kompania që kishte fituar tenderin, ishte themeluar pesë ditë pas tenderit.
Kontrata mes Ministrisë dhe LIP Ks plus IT ShPK, ishte nënshkruar më 10 janar 2025 dhe vendimin për të ishte marrë bashkë me tani kryeministrin në detyrë, Albin Kurti.
Zbatimi i kësaj kontrate, (referuar kontratës) do të fillonte nga dita e nënshkrimit dhe vlente për 20 vite.
Por, Ligji për Pronën Publike, përkatësisht neni 17, Qiraja dhe Këmbimi thotë:
“Prona në pronësi të Republikës së Kosovës përkatësisht e institucionit qendror ose prona e komunës mund të jepen me qira deri në 15 vite me vendim të Qeverisë” dhe vazhdon se për më shumë se 15 vite, prona mund të jepet me qira vetëm me vendim të Kuvendit të Kosovës.
Çmimi (problematik)
Te pjesa e çmimit, thuhet se ‘kompensimi për shërbimet e ofruara nga operatori ekonomik në funksionalizimin dhe operimin e fabrikës për përpunimin e produkteve shtazore – do të bëhet nga subvencionet e Ministrisë që do të llogaritet në bazë të sasisë së materialeve të grumbulluara”.
Që nënkupton se: përveç që Ministria e lëshon me qira, edhe i jep subvencione kompanisë.
“Subvencionimi për cdo ton të grumbulluar do të jetë në shumën prej 0,16 centë për kilogramë” – thotë kontrata.
“Sipas përllogaritjeve, nëse ja jep 0,16 centë për kilogram atëherë në vit i bie 3 milionë e 200 mijë euro. Këto i ka para të garantuara. Po e fut Ministrinë në borxh 20 vjecar, ku paret e taksave duhesh me ia dhënë një private që gjenerimin kryesor të të hyrave do ta ketë nga shitja e produkteve, por ti po ia jep edhe 60 milionë – konkurentët nuk e dinin se do të ketë subvencion” – sqaronte gazetari Lirim Mehmetaj kontratën.
Prapa investimeve – kompania nga Serbia
Një çështje tjetër e bujshme në këtë kontratë, është përfshirja e kompanisë nga Serbia “MR&CO” më pronar Muamer Ragipoviq.
Sipas hulumtimeve të Kallxo, kjo kompani që është e regjistruar në Malin e Zi, zotërohet nga kompania me emër të njëjtë në Beograd.
Kallxo kishte raportuar se kompania e ka një punëtor në Malin e Zi dhe katër punëtor në Serbi.
Faton Peci ishte pyetur nga gazetari i Kallxo, se a e njihte Ragipoviqin, deklaronte se jo.
“Jo nuk e njoh. Ministri i bujqësisë jo vetëm Ragipoviq, por nuk e njoh asnjë person që është përfitues i subvencioneve’ – pati deklaruar Peci, por më vonë, kishte thënë se Ragipoviq ‘është boshnjak/mysliman”.
“Nëse në vend të Muhamer Ragipoviq aksionari do ta kishte emrin Muhamed Ragipi, shqiptar i Luginës por shtetas i Serbisë, a do të kishte raportimi të njëjtin titull, insinuatë dhe jehonë? Jo. Atëherë pese gjithë kjo zhurmë për një boshnjak/musliman nga Novi Pazari? – do të shkruante Peci.
Hulumtimi i mëtutjeshëm: Ragipoviq njeri i Vuçiqit
Në një shpjegim të detajuar në Debat Plus, Lirim Mehmetaj do të elaboronte gjithë skemën e operimit të ‘myslimanit boshnjak Ragipoviq’.
Ai është pronar i RTVSP në Serbi, një ‘konzorcuimi mediatik’ që ka dy qëllime.
“Qëllimi i parë është rikthimi i të dënuarve për krime lufte ne Serbi si heronj dhe qëllimi i dytë është ndjekja dhe përcjellja e mesazheve të Vuçiqit në Serbi’ – deklaronte Lirim Mehmetaj.
“Pjesë e kësaj ësshtë myslimani boshnjak që fiton tender prej Qeverisë së Kosovës”, deklaronte Mehmetaj.
Pasi Ragipoviq kishte fituar tender në Kosovë, ai kishte shitur aksionet e tij.
“Çudia e madhe është se në momentin kur e ka fitu kjo kompania thirrjen publike për funksionalizimin e fabrikës, në atë moment ka qenë pronar me 30% të aksioneve Ragipoviq”, thotë Mehmetaj.
Çka ndodhi sot?
Mëngjesin e sotëm, Policia me urdhër të Prokurorisë Speciale ka zbarkuar në ambientet e Ministrisë së Bujqësisë, Pylltarisë dhe Zhvillimit Rural.
“Ju njoftojmë se Policia e Kosovës, me urdhër të Prokurorisë Speciale të Republikës së Kosovës është duke zhvilluar bastisje në katër lokacione. Bastisjet po zhvillohen mbi dyshimet për Fabrikën për mbetje shtazore. Për detaje të tjera, publiku do të njoftohet gjatë ditës” – është thënë nga Prokuroria Speciale.
Ndërkohë, nga Ministria e Bujqësisë, në një deklaratë për media, thanë se nga kjo Ministri, ‘që nga dita e parë kanë qenë në dispozicion të organeve të rendit dhe drejtësisë për çdo informatë rreth secilit interesim’.
“Që nga dita e parë, jemi në dispozicion të organeve të rendit dhe drejtësisë, duke ofruar çdo informatë për secilin interesim të tyrin, duke theksuar rëndësinë e sundimit të ligjit. Kemi bashkëpunuar ngushtë me këto institucione dhe do të vazhdojmë ta bëjmë këtë, të udhëhequr nga parimet e transparencës dhe llogaridhënies”, kanë thënë nga Ministria.
Më herët, pas dështimit të 22-të të seancës konstituive, ministri në detyrë Faton Peci është parë duke dalë nga hyrja prapa Kuvendit të Kosovës.
