Në katër komunat me shumicë serbe në veri të vendit, Lista Serbe ka rikthyer kontrollin pothuajse të plotë, duke ruajtur epërsinë në Zveçan, Zubin Potok dhe Leposaviq, ndërsa në Mitrovicën e Veriut ajo përballet me sfidën më të fortë ndonjëherë, ku Lëvizja Vetëvendosje! prin me rezultat të lartë.
Në Mitrovicën e Veriut, kandidati i Lëvizjes Vetëvendosje!, Erden Atiq, prin me 48.35% të votave (220 vota), duke lënë pas kandidatin e Listës Serbe, Milan Radojević, me 25.49% (116 vota).
Në vendin e tretë është Flutura Hamza Azemi e PDK-së me 16.48% (75 vota), ndërsa iniciativat lokale serbe kanë marrë pjesën tjetër të votave. Ky rezultat e bën Mitrovicën e Veriut komunën e vetme ku Lista Serbe sfidohet seriozisht, me Vetëvendosjen që prin për herë të parë në një garë në veri.
Në Zveçan, Dragiša Milović nga Lista Serbe prin bindshëm me 82.37% të votave (1,509 vota). Pas tij renditet Zoran Obrenović nga Srpska Demokratija me 8.57% (157 vota), ndërsa kandidatët shqiptarë të Vetëvendosjes dhe PDK-së kanë marrë përkatësisht 4.15% (76 vota) dhe 3.71% (68 vota). Zveçani mbetet bastion tradicional i Listës Serbe, me dominim të plotë elektoral.
Në Zubin Potok, Miloš Perović nga Lista Serbe prin me 81.81% të votave (1,151 vota). Pas tij renditen disa iniciativa të vogla serbe si Srpski Narodni Pokret me 5.83%, Kosovski Savez me 5.12%, dhe të tjera me përqindje më të ulëta.
Kandidatët shqiptarë kanë marrë vetëm disa vota simbolike, duke treguar se Zubin Potoku vazhdon të mbetet nën ndikimin e plotë të Listës Serbe.
Në Leposaviq, Zoran Todić nga Lista Serbe prin me 70.46% të votave (1,686 vota). Pas tij vjen Vladimir Radosavljević nga Srpska Demokratija me 11.20% (268 vota), dhe Vesna Pantović nga iniciativa “Za Slobodu, Pravdu i Opstanak” me 6.64% (159 vota).
