Zyrtarë të Bashkimit Evropian(BE) kanë konfirmuar tashmë se më 2 maj, në fokus të takimit ndërmjet kryeministrit të Kosovës, Albin Kurti, dhe presidentit të Serbisë, Aleksandar Vuçiq, do të jetë edhe çështja e Asociacionit, përkatësisht prezantimi i draft-statutit të Asociacionit, i hartuar nga Ekipi Menaxhues.
Analisti dhe njohësi i rrethanave politike në Ballkan, Daniel Server, në një prononcim për Front Online thotë se Kosova duhet të ofrojë konceptin e vet për vetë-menaxhim, të cilin ua ka premtuar serbëve që jetojnë në Kosovë.
Profesori Server konsideron se nuk duhet biseduar për një Asociacion që ka kompetenca ekzekutive, dhe se kjo nuk do të diskutohet në takim nëse duhet besuar amerikanëve.
“Mendoj se Kosova duhet të ofrojë konceptin e saj për vetë-menaxhim që ua ka premtuar komunitetit serb (Asociacioni nëse kjo është ajo që nënkuptohet). Por kompetencat ekzekutive janë jashtë diskutimit, nëse duhet besuar amerikanëve”, thotë Server për Front Online.
Server thotë se Kryeministri Kurti në dialogun me Serbinë, po mundohet të bëjë më të mirë për Kosovën.
“Ai po mundohet të bëjë më të mirën për Kosovën. Kjo është përgjegjësia e tij”, tha ai.
Server ka komentuar edhe shkeljet që po i bënë Serbia të marrëveshjes së Ohrit.
Shkelje të marrëveshjes ajo bëri edhe në ditën e zgjedhjeve.
Ai konsideron se reagimi i BE-së karshi Serbisë është i vonuar.
“Një reagim i BE-së është i vonuar, por BE-ja është e ndarë dhe me të vërtetë nuk mund të bëjë shumë”, tha ai për Front Online.
Duke komentuar procesin zgjedhor në veri të vendit, Server thotë se sfidë do të mbetet ajo nëse njerëzit e zgjedhur mund të qeverisin në mënyrë efektive.
“Vetë zgjedhjet shkuan mirë, por është e vështirë të shihet se si njerëzit e zgjedhur do të jenë në gjendje të qeverisin ne mënyre efektive”, tha ajo për Front Online.
Server derisa flet për dialogun dhe marrëveshjen e arritur ndërmjet Kosovës dhe Serbisë, konsideron se një marrëveshje përfundimtare është ende shume larg.
Asociacioni i komunave me shumicë serbe parashikohet që të mbledhë rreth vetes dhjetë komuna në Kosovë të banuara me shumicë serbe: Mitrovicë e Veriut, Kllokot, Partesh, Ranillug, Graçanicë, Zveçan, Zubin Potok, Novobërdë, Leposaviq dhe Shtërpcë.
Sipas marrëveshjeve, Asociacioni ka për qëllim të përfaqësojë interesat kolektive të këtyre komunave, veçmas në fushën e arsimit, shëndetësisë, planifikimit urban dhe rural si dhe të ekonomisë./Front Online/
