Shqipëria dhe Kosova do të jenë nikoqirë të një prej stërvitjeve më të mëdha ushtarake shumëkombëshe, e njohur si “Defender Europe 25”, e cila do të zhvillohet më 25 maj.
Ministri i Mbrojtjes i Shqipërisë, Pirro Vengu, njoftoi se stërvitja, që do të drejtohet nga Komanda Evropiane e Shteteve të Bashkuara të Amerikës (USEUCOM), do të përfshijë forcat e NATO-s dhe shtetet partnere.
Nëpërmjet një postimi në rrjetin social Facebook, Vengu theksoi se stërvitjet do të zhvillohen në Shqipëri dhe Kosovë dhe do të përfshijnë operacione sulmuese dhe mbrojtëse, mbrojtjen e objekteve kritike dhe sigurinë në pika kyçe dislokimi.
Ai gjithashtu theksoi se kjo është një mundësi e shkëlqyer për të testuar ndërveprueshmërinë e forcave dhe për të dërguar një mesazh të qartë: NATO është e bashkuar.
“Më 25 maj, Shqipëria mirëpret një nga stërvitjet më të mëdha ushtarake shumëkombëshe: Defender Europe 25, e drejtuar nga Komanda Evropiane e SHBA (USEUCOM). Forcat e NATO-s dhe partnere do të stërviten në Shqipëri dhe Kosovë për mbrojtjen e objekteve kritike, operacione sulmuese dhe mbrojtëse, si dhe për sigurinë në pika kyçe dislokimi. Një test i ndërveprueshmërisë dhe një mesazh i qartë: NATO është e bashkuar”, ka shkruar Vengu.
Për stërvitjen në Kosovë pati njoftuar edhe ministri i Mbrojtjes, Ejup Maqedonci.
