Dy senatorët amerikanë, Chris Murphy dhe Gary Peters, gjatë vizitës së sotme në Kosovë, thanë se Serbia nuk duhet ta pengojë Kosovën në anëtarësimin në organizata ndërkombëtare.
Po ashtu, ata thanë se këtë vit duhet të kryhet Asociacioni, që të mundësohet lëvizja drejt normalizimit, që do të çojë deri te njohja e ndërsjellë.
Lidhur me këtë, deputeti i Lëvizjes Vetëvendosje, Gramos Agusholli, thotë për Gazeta Blic se nuk dyshon në dëshirën e senatorëve amerikanë që Kosova të mos pengohet për anëtarësim nga Serbia, por që kjo e fundit e ka shkelur çdo pikë të marrëveshjes duke lobuar kundër Kosovës.
“Unë padyshim besoj në sinqeritetin e senatorëve amerikan dhe dëshirën e tyre që kjo çështje të bëhet ashtu siç po thonë ata, mirëpo deri më tani Serbia ka shkelur çdo pikë të marrëveshjeve, duke lobuar fuqishëm kundër Republikës së Kosovës, si në aspektin e sovranitetit dhe integritetit territorial, e po ashtu edhe kundër anëtarësimit të Kosovës në organizata ndërkombëtare”, thotë ai.
Sipas deputetit, Kosova është për marrëveshje finale me njohje reciproke, por që nuk varet nga ne dhe se Serbia vazhdimisht në dialog ka qasje destruktive e skenarë për destabilizim të vendit.
“Ne jemi për arritjen e një marrëveshje finale, që në qendër ka njohjen reciproke, por kjo nuk varet vetëm nga ne. Dhe deri më tani çka kemi përfituar nga dialogimi me palën serbe janë, qasja destruktive dhe skenarë të cilat e kanë destabilizuar veriun e vendit përmes bandave kriminale të instaluara direkt nga Beogradi zyrtar”, vlerëson Agusholli për Gazeta Blic.
Lidhur me Asociacionin, deputeti i VV-së thotë se nëse është në kundërshtim me Kushtetutën, nuk është i pranueshëm.
“Sa i përket asociacionit, prapë po e përsëris, një asociacion që është në kundërshtim me Kushtetutën e Kosovës është i papranueshëm për palën tonë”, deklaron deputeti Gramos Agusholli.
