Presidenti i Shteteve të Bashkuara të Amerikës, Donald Trump të premten është pyetur mbi incidentin ku u përfshinë presidenti francez, Emmanuel Macron dhe bashkëshortja e tij, Brigitte Macron.
Derisa një video tregonte këtë të fundit duke e shtyrë në fytyrë dhe duke i dhënë një shuplakë, Trump u pyet mbi këtë gjatë një bisede me gazetarë.
Ai pati disa këshilla për çiftin presidencial:
“Sigurohuni që dera të qëndrojë e mbyllur. Ajo s’ishte e mirë. Kam folur me të dhe ai është mirë, ata janë mirë. Janë dy njerëz shumë të mirë, i njoh shumë mirë. Dhe s’e di për çka ndodhi ajo, por i njoh mirë dhe janë mirë”.
Zyra e presidentit francez, Emmanuel Macron, të hënën minimizoi një incident në të cilin bashkëshortja e tij, Brigitte, u duk sikur e shtyu atë në fytyrë, kur çifti arriti në Vietnam në fillimin e një vizite në Azinë Juglindore.
Në një video, Brigitte Macron u duk sikur i dha një shuplakë bashkëshortit para se ai të zbriste nga aeroplani të dielën vonë, duke e nxitur që të tërhiqej para se të bënte gjest të përshëndetjes para kamerave te dera e aeroplanit, raporton agjencia e lajmeve “Reuters”.
Bashkëshortja e presidentit për ca çaste nuk u duk te dera e aeroplanit, duke e pamundësuar pamjen e gjuhës së trupit. Më pas, çifti zbriti shkallëve të aeroplanit bashkë.
Një zyrtar i Pallatit Elysee e minimizoi skenën, duke mohuar se ajo paraqet një grindje mes çiftit, që janë të martuar nga viti 2007.
“Ishte një moment, kur presidenti dhe gruaja e tij po relaksoheshin për herë të fundit para fillimit të udhëtimit duke pasur një të qeshur” – tha zyrtari. “Ishte një moment afërsie” – shtoi ai.
