Në rrugën “Ali Zeneli” në Mitrovicë një kompani ndërtimore, “Premium Home”, ka nisur rrënimin e disa shtëpive, për ta përgatitur terrenit për të ndërtuar objekt banesor.
Pikërisht në vendpunishten e kësaj kompanie sot është lënduar një person, i cili ka marrë trajtim mjekësor fillestar në Spitalin e Mitrovicës, i cili më pastaj është dërguar për trajtim të mëtutjeshëm mjekësor në ShSKUK.
Lëndimin e këtij personi për Veriu.info e ka konfirmuar drejtor i shërbimit shëndetësor në Spitalin e Mitrovicës, Dr. Fatbardh Rexha, i cili ka treguar se i lënduari është transportuar për në QKUK për tajtim mjekësor.
“I lënduari është transportuar me emergjencë në QKUK në Prishtinë, për shkak të thyerjeve që ka pasur në kafazin e krahërorit dhe në brinj. Këtë sapo ma ka konfirmuar drejtoresha e emergjencës”, tha për Veriu.info drejtori shëndetësor i Spitalit të Mitrovicës, Fatbardh Rexha.
Veriu.info ka kontaktuar edhe pronarin e kompanisë ndërtimore “Premium Home”, Jeton Shala, që po kryen rrënimin e objekteve, i cili ka thënë se personi i lënduar në vendpunishten e tij nuk është punëtor i kësaj kompani.
“Personi nuk ka qenë kurrë punëtor i kompanisë tonë dhe po i njëjti ka hyr pa lejen tonë në objekt. Për shkak të gjendjes së tij financiare, ai ka hyrë për t’i marrë dërrasat e kulmit sepse i janë duhur për nevoja të tij vetjake”, ka thënë Shala për Veriu.info.
Shala, tutje ka thënë se kompania e tij i posedon të gjitha lejet e nevojshme për rrënimin e atyre objekte, që sipas tij, i posedon të gjitha adekuate.
I pyetur se kush i ka vendosur shiritat në vendpunishte pas këtij lëndimi, Shala ka thënë: “Shiritat nuk janë vendosur nga policia, por nga vet ne për arsye se shumë njerëz janë afuar afër vendpunishtes tonë”.
