Në ditën e dytë të dëshmisë së ish-Ndihmës Sekretarit amerikan të Shtetit, James Rubin, dhënë në mbrojtje të ish-Presidentit të Kosovës, Hashim Thaçi, një aparat i tërë profilesh të fabrikuara të Vetëvendosjes është vënë në lëvizje në rrjetet sociale.
Me një sinkron lehtë të vërejtshëm, këto llogari punojnë çdo minut për shtrembëruar, përçudnuar e keqpërdorur në mënyrat më brutale gjithçka që shkruhet, deklarohet e raportohet rreth rastit me synim diskreditimin të figurës së ish-Presidentit Thaçi.
Përderisa Rubin dëshmoi sot mes tjerash për nivelin e lartë të besimit që Shtetet e Bashkuara kishin Hashim Thaçit në atë kohë, profilet pro-pushtetit në Kosovë shpërndajnë sajime e interpretime të paimagjinueshme.
Në majë të kësaj piramide propagandistike në Facebook qëndron “Jona Çitaku”, një profil i rremë me mbi 15 mijë ndjekës, në listën e miqve të së cilës figuron edhe zëdhënësi i degës së Vetëvendosjes në Prishtinë, Arlind Manxhuka. Në njërën nga dhjetëra shkrimet të përditshme, ky profil shkruan:
“Në Rambuje, Adem Demaçi ishte i qartë dhe i prerë: Pavarësi ose asgjë. Ai nuk pranoi kompromis qe e vononte çlirimin. Në atë kohë, pranë tij ishte edhe Albin Kurti bashke me Demaçin, perfaqesonin zërin e vendosmërisë kombëtare. Ndërsa Hashim Thaçi, sipas vetë deshmive të ndërkombëtarëve, ishte gati të pranonte logjikën e shtyrjes: pavarësia mund të flitet më vonë. Këtu eshtë dallimi historik: Demaçi e Kurti: zëri i palëkundur i parimit dhe i pavarësisë. • Thaçi: fytyra e kompromisit të diplomacisë.Historia nuk mund te rishkruhet. Kosova u çlirua me vendosmëri, jo me vonesa.”
Postimet e “Jona Çitakut” përforcohen me shpërndarje, komente e pëlqime rregullisht nga profile të tjera të dyshuara si të rreme, si “Sara Fehmi Blakqori”, me rreth 4 mijë ndjekës.
Në një publikim tjetër, i njëjti profil kundërshton protestat masive të fundit në Hagë dhe në Prishtinë në mbrojtje të Ushtrisë Çlirimtare: “Me votu vetë Gjykatën speciale, e pastaj me dalë me protestu kundër saj, veç të ne ndodh! Këta protestues mbas Hashim Thaçit quhen tradhetar sepse vetë Hashimi ka thënë: Kush është kundër gjykatës speciale është tradhtar, të paktën unë nuk do të jem! Mos harroni si pasojë e dështimit të drejtësisë në Kosovë, u krijua gjykata speciale.”
Këto publikime grumbullojnë qindra pëlqime e komente dhe amplifikohen nga një rrjet llogarish të tjera, në tentativë për të krijuar mjegulli në dritën e dëshmisë së Rubin dhe figurës së Hashim Thaçit.
Profilet në Facebook e ‘grave të rreme’ kanë pushtuar rrjetet sociale me mbështetje për Vetëvendosjen në vitet e fundit. Një praktikë e tillë për kontrollin e narrativës politike vazhdon të përdoret në mënyrë të përditshme.
Së fundi, deputetja e VV-së, Fitore Pacolli ishte kapur nga fotoreporterit i Nacionales, Visar Kadrolli teksa në ekranin e tabletit të saj në shfaqej një mesazh i ardhur në “Messenger”, i cili udhëzonte se si të fabrikohej një postim i rremë në rrjetet sociale.
Në të shfaqet një grup i hapur në Messenger, i titulluar “Seanca çdo 48h”, ku një nga anëtarët shpërndan një vegëz me përshkrimin në gjuhën angleze: “Zeoob: Fake Facebook Post Generator with Comments” – një platformë që gjeneron postime të rreme në Facebook, të kompletuara me komente.
