Hetimet për vrasjen e rreshterit Muhamed Lika po vazhdojnë, ndërsa një detaj i ri ka dalë në dritë, në vitin 2021, lokalit të tij i ishte vënë flaka, raporton Gazeta Sinjali.
Megjithatë, Prokuroria Themelore në Ferizaj thotë se deri më tani nuk ka gjetur ndonjë lidhje mes djegies së lokalit dhe vrasjes makabre që tronditi Kaçanikun mbrëmë.
Kryeprokurori Burim Çerkini ka konfirmuar se ende nuk dihet kush e kreu aktin e zjarrvënies para tre vitesh.
“Është e vërtetë që në vitin 2021 është djegur lokali i rreshterit, por për shkak të kohës së gjatë nuk kemi mundur të ndërlidhim ndonjë motiv apo arsye që kjo të ketë lidhje me vrasjen. Deri më tani, nuk ka asnjë provë që i lidh këto dy raste”, deklaroi Çerkini para mediave.
Sa i përket vrasjes, ai bëri të ditur se të dyshuarit janë dy persona, por ende nuk janë identifikuar.
“Nga pamjet e siguruara, mund të themi vetëm se ata janë persona të rinj”, shtoi ai.
Hetimet po vazhdojnë, ndërsa Prokuroria po punon për të zbardhur motivin dhe për të sjellë para drejtësisë përgjegjësit e kësaj vrasjeje tronditëse.
