Dimal Basha, Kryetar i Kuvendit të Kosovës e shpalli “të përmbyllur” seancën konstitutive edhe pa zgjedhjen e një Nënkryetari serb të Kuvendit të Kosovës, për çka Eugen Cakolli nga Instituti Kosovar për Demokraci, e quajti “shpikje” dhe “pa asnjë vlerë juridike”.
Cakolli tha se deputetët e Kuvendin e Kosovës “nuk i meritojnë ato pozita dhe funksione”.
Postimi i plotë:
Seanca konstituive nuk mund të konsiderohet e përmbyllur pa zgjedhjen e të gjithë nënkryetarëve.
Rrjedhimisht, nuk mund të ketë materializim të asgjëje – as zhvillim të procedurave apo ushtrim të funksioneve parlamentare, e as rrjedhje të afateve kushtetuese.
Konstatimet (lexo: “shpikjet”) e fundit të Kryetarit nuk kanë asnjë vlerë juridike. I tërë ky non-sens politik tashmë mund të zgjidhet vetëm nga Gjykata – qoftë me konstatim të dështimit të konstituimit të Kuvendit brenda afatit 30-ditor, ose me shpallje të pavlefshme dhe përsëritje të procedurës së votimit për nënkryetarët e komuniteteve.
Ajo që ka rëndësi është të theksohet se sot, edhe një herë tjetër, u vulos fakti se deputetët e kësaj legjislature nuk i meritojnë ato pozita e funksione, e as qytetarët nuk e meritojnë një legjislaturë kaq absurde.
