Kryetari i Kuvendit të Kosovës, Dimal Basha, ka reaguar publikisht për një punim të vitit 2012, duke i cilësuar ato si të pavërteta dhe duke theksuar se përgjegjësia e tij lidhet vetëm me një pjesë të caktuar të punimit.
“Nuk është hera e parë që sulmohem me të pavërteta nga qarqe të caktuara, mirëpo para gjithë qytetarëve kam përgjegjësinë dhe obligimin t’ju jap llogari dhe sqarim për akuzat e ngritura sot”, ka shkruar Basha.
Ai sqaron se bëhet fjalë për një punim akademik nga koha kur ishte student.
“Punimi që po qarkullon në media është i vitit 2012, në kohën kur unë kam qenë student. Autorësia ime në këtë artikull i përket vetëm Kapitullit 3, i cili trajton depërtimin e Islamit fundamentalist në Evropën Juglindore, me fokus Kosovën. Këtu përfundon përgjegjësia ime lidhur me punimin në fjalë.”
Më tej, ai ka përmendur edhe reagimin e autores së punimit, Jana Arsovska, e cila sipas tij ka sqaruar se Basha ka kontribuar vetëm në atë kapitull.
“Në lidhje me këtë çështje, tashmë është sqaruar për media edhe vet autorja Jana Arsovska, e cila ka dërguar një email demantues, dhe e ka bërë të qartë që unë kam dorëzuar për publikim vetëm Kapitullin 3 dhe mbaj përgjegjësi vetëm për përmbajtjen në atë kapitull.”
Kryeparlamentari ka theksuar se qëndrimi i tij ndaj luftës së UÇK-së është i qartë dhe i palëkundur.
“Unë, Dimal Basha, e çmoj lart luftën e Ushtrisë Çlirimtare të Kosovës dhe sakrificën e popullit tonë për liri. Nga goja ime dhe nga duart e mia nuk është shkruar dhe nuk do të mund të gjendet asnjë përmbajtje që bie ndesh me këtë vlerë të shenjtë të popullit tonë.”
Në fund të reagimit, Basha i kërkoi falje qytetarëve të shqetësuar nga, siç tha ai, “raportimi i rremë”.
“I kërkoj falje qytetarëve që janë shqetësuar nga ky raportim i rremë, dhe prandaj lus mediat që të raportojnë drejtë dhe saktë, e në veçanti për tema kaq të ndjeshme, që nuk lidhen vetëm me mua personalisht, por me tërë popullin e Republikës së Kosovës.”
