Më 21 prill, në pikën e derivateve EXFIS në magjistralen Prishtinë–Mitrovicë, vetëm një kilometër pas hyrjes në këtë aks rrugor, disa qytetarë raportuan probleme me automjetet e tyre pas furnizimit me derivate. Dyshohet se problemet lidhen me cilësinë e dobët të karburantit.
Sipas informacioneve të siguruara nga Raporto24, të paktën tre qytetarë kanë paraqitur dëshmitë e tyre në polici dhe kanë dërguar video për shqetësimet që u paraqitën menjëherë pas furnizimit. Në vendin e ngjarjes janë parë forcat policore, disa vetura të bllokuara dhe një pjesë e pikës së furnizimit është mbyllur.
Ekipi i Raporto24 ka vizituar pikën dhe ka biseduar me disa punëtorë të EXFIS të cilët nuk kanë ofruar detaje për natyrën e problemit, por kanë konfirmuar se janë duke u marrë me rastin. Po ashtu, është kontaktuar një zyrtar për kujdes ndaj klientëve nga kompania EXFIS, por ai ka refuzuar të flasë.
Raporto24 ka dërguar pyetje zyrtare në adresën elektronike të kompanisë më 21 prill, duke bashkëngjitur edhe materialet relevante, por deri më 23 prill nuk ka marrë ende përgjigje.
“Pamje nga mbyllja e një pjese të EXFIS më 21 prill”
“Pamje: Punonjës i EXFIS merr mostra të derivateve për hetimin e problemit”
“Pamje: Punonjës i EXFIS merr mostra të derivateve për hetimin e problemit”
“Pamje: Policia e Kosovës në pikën e derivateve EXFIS”
“Pamje: Vetura me probleme pas furnizimit në EXFIS”
