Zyrtarët e institucioneve shtetërore janë të thirrur të mbrojnë interesin e publikut, respektivisht interesin e qytetarëve të Kosovës, nga taksat e të cilëve edhe paguhen. Mirëpo, jo gjithherë, ata e kryejnë këtë detyrë.
Rasti më eklatant që ka vërejtur redaksia e Veriu.info është ai i zyrtarit për qasje në dokumente publike të Agjencisë së Ushqimit dhe Veterinarisë, Blerdar Berisha, për të cilin ka dyshime se është kthyer në mbrojtës të interesave të kompanive që merren me import të kafshëve të gjalla.
Veriu.info ka bërë kërkesë për qasje në dokumente publike në AUV, të udhëhequr nga Drejtori Ekzekutiv Bekim Hoxha, më 11 mars, për qasje në të gjitha dokumentet që janë nxjerrë për kompanitë: 1) Mishtore Meli Sh.P.K., 2) Meli Holding L.L.C. dhe 3) Melii FARM Sh.P.K.
Pas kërkesës së Veriu.info, drejtori ekzekutiv i AUV-së, më 17 mars, ka nxjerrë vendim me të cilin gazetës Veriu.info i jepet qasje e plotë në këto dokumente, ndërsa të njëjtën ditë zyrtari i AUV-së për qasje në dokumente publike, Bledar Berisha, na ka njoftuar se të nesërmen mund t’i marrim dokumentet.
Kur gazetari i Veriu.info ka shkuar në AUV për t’i tërhequr dokumentet, atij i janë ofruar vetëm pjesërisht dokumentet e kërkuara, ku nga zyrtari Bledar Berisha i është thënë që të hënën (23 mars) do t’i jepen edhe disa procesverbale të inspektorëve të AUV-së për këto kompani, pasi që akoma nuk ua kanë sjellë inspektorët.
Mirëpo, edhe pse kanë kaluar 16 ditë nga data e nxjerrjes së vendimit, këto procesverbale nuk i janë dhënë gazetës Veriu.info.
Veriu.info më 17 mars i ka kërkuar përmes SMS zyrtarit Blerdar Berisha këto procesverbale, por ai ka thënë që nuk i ka të gatshme akoma.
Në momentin që është paralajmëruar se artikulli do të publikohet sot pas orës 16:00 nëse nuk ofrohen procesverbalet, i njëjti ka fshirë mesazhet e komunikimit në WhatsApp, një rast i paprecedentë për një zyrtar publik, i cili komunikimin e ka zhvilluar me telefon zyrtar.
Çka fshihet pas procesverbaleve?
Burime të Veriu.info nga AUV bëjnë të ditur se zyrtari Bledar Berisha ka marrë instruksione nga ‘shefat’ që të mos ofrohet qasja në këto procesverbale, pasi që ka dyshime të bazuara se inspektorët e AUV-së nuk i kanë përmbushur detyrat zyrtare në raport me kompanitë: 1) Mishtore Meli Sh.P.K., 2) Meli Holding L.L.C. dhe 3) Melii FARM Sh.P.K.
Kush janë kompanitë: Mishtore Meli Sh.P.K., Meli Holding L.L.C. dhe Melii FARM Sh.P.K.?
Melii FARM Sh.P.K. është kompani nga Podujeva, me pronar Mensur Bunjaku, e themeluar në vitin 2021. Aktivitet kryesor kjo kompani ka përpunimin dhe konservimin e mishit.
Meli Holding L.L.C. është po ashtu kompani nga Podujeva, me pronarë Ramadan dhe Besim Bunjaku, të cilët janë familjarë të Mensur Bunjakut. Si aktivitet kryesor ka aktivitetet e kompanive “holding”.
Mishtore Meli Sh.P.K. është kompani e regjistruar në Prishtinë, ku aksionar me 100% të aksioneve është kompania Meli Holding L.L.C.
Ndryshe, vitin e kaluar Veriu.info kishte raportuar ekskluzivisht se si AUV, me vendim, i kishte pezulluar lejen e importit kompanisë “Melii Farm” Sh.P.K., pasi që ishte zbuluar se nuk i raportoi 2965 kafshë të futura në Kosovë.
Në lidhje me pezullimin e licencës për këto kompani dhe disa të tjera, ish-ministri Faton Peci kishte thënë se dëmi financiar i shkaktuar nga këta operatorë ekonomikë është në vlerë qindra milionë euro, duke shtuar se, sipas tij, është goditur hallka më e fortë e zinxhirit të importuesve të kafshëve të gjalla në Kosovë, duke i mbajtur përgjegjës për tentimin e keqpërdorimit dhe mashtrimit në procesin e importit.
