Në Ditën e Presidentit, që shënohet më 24 maj, presidentja e Kosovës, Vjosa Osmani, ka kujtuar themeluesin e shtetit, Ibrahim Rugova, i cili e vendosi këtë datë si simbol të institucionit të kreut të shtetit.
Përmes një videoje të publikuar në rrjete sociale, Osmani ka ndarë momente të veçanta me familjen e ish-presidentit Rugova, duke shfaqur imazhe dhe kujtime nga jeta e tij. Në sfond dëgjohet kënga “Kur ka ra kushtrimi në Kosovë”, e cila kishte qenë e preferuar e Rugovës dhe njëkohësisht ishte pjesë e garës për himnin shtetëror.
Presidentja u shpreh se trashëgimia politike e Rugovës vazhdon të jetë udhërrëfyese për të ardhmen e Kosovës.
“Sot është Dita e Presidentit, e vendosur si e tillë nga Presidenti ynë historik Dr. Ibrahim Rugova, ati themeltar i Republikës sonë. Sot ecim hapave të tij, në përpjekje të vazhdueshme për ta bërë Kosovën atë që e deshën e për të cilën sakrifikuan breza të tërë”, ka shkruar Osmani.
