Nesrin Rexha-Kusev është gastronome në një nga bizneset që operon në zonën e njohur si “Kafet e Rakisë” në kryeqytet. Ajo thotë se për 60 vitet që ka ushtruar këtë veprimtari, asnjëherë nuk ka pasur një eksperiencë të tillë.
Sipas saj, djali i hallës së kryetarit të Prishtinës, Perparim Ramës, Driton Rrahmani, tash e sa muaj është duke ushtruar kundërligjshëm veprimtarinë e tij.
Rexha-Kusev në një intervistë dhënë gazetares së Insajderit, Dijellza Preniqi, ka deklaruar se Rrahmani, i cili është edhe bashkëshorti i kandidates së LDK-së për asambleiste në Prishtinë, Vjosa Rrahmani, pronën e tij “me letra ia ka lënë një kamarierit, për të mos u kuptuar që ajo pronë është e tij”.
Tutje, gastronomja ka pretenduar se nga ky lokal, gypat e ujërave të zeza janë lidhur ilegalisht me tubat e ujërave atmosferike, janë prerë drunjtë e pishave dhe është uzurpuar hapësira publike me vendosjen e karrikave dhe tavolinave të shumta.
Sot gjatë ditës, ekipi i Gazetës Insajderi ka qëndruar në vendin ku pretendohet se kanë ndodhur të gjitha këto parregullsi. Po ashtu, edhe pronarët e biznesit që kanë paraqitur ankesën e tyre tek Insajderi janë përballur me pronarin tjetër të pretenduar.
Insajderi, në lidhje me këto pretendime, ka kontaktuar edhe Drejtorin e Shërbimeve Publike, Bekim Brestovcin. Deri në momentin e publikimit të këtij materiali, ai nuk ka kthyer përgjigje.
Ndërkaq, burri që ka pretenduar se është pronari faktik i biznesit, përkundër premtimeve që do ta dërgojë në redaksi dokumentin që dëshmon lejen për ushtrimin e veprimtarisë biznesore, nuk e ka dërguar atë.
