Vjosa Osmani ka konfirmuar se takimi i përbashkët me liderët e katër partive shqiptare parlamanetare që kishte për qëllim arritjen e një pajtueshmërie për konstituimin e Kuvendit të Kosovës, nuk ka rezultuar i suksesshëm.
Presidentja, e cila ishte nikoqire e një takimi me katër liderët e partive politike parlamentare të enjten, tha se liderët kishin qëndrime të ndryshme.
Në një konferencë për media, Osmani e vlerësoi qasjen e liderëve të partive politike, Albin Kurtit të LVV-së, Memli Krasniqit të PDK-së, Lumir Abdixhikut të LDK-së dhe Ramush Haradinajt të AAK-së, ndonëse nuk u arrit marrëveshje mes tyre për zgjidhjen e ngërçit politik.
“Sot me liderët e partive kryesore në vend. Siç e dini sot bëhet një muaj nga seanca e parë e Kuvendit të Kosovës, të cilën e kam ftuar me 15 prill në përputhje me kompetencat kushtetuese, por fatkeqësisht as pas 6 përpjekjesh nuk ka pasur rezultat në konstituimin e Kuvendit”, tha Osmani.
Osmani tha se moskonstituimi i Kuvendit i dëmton më së shumti qytetarët e vendit.
“Moskonsitutimi i kuvendit mund t’i duket dikujt se dëmton vetëm politikanë apo parti të caktuara, por megjithatë kjo i dëmton të gjithë qytetarët tanë pa dallim”, tha ajo.
“Kushtetua e Kosovës, ndër parimet themelore parasheh se parimi i ndarjes së pushteteve apo parimi i kontrollit dhe balancit është një ndër vlerat apo parakushtet e funksionimit kushtetues të institucioneve. Dhe, një ndër shtyllat që parashihet aty është edhe legjislativi. Me situatën aktuale po rrezikohet ky parim kushtetues. Prandaj, i kam inkurajuar liderët e partive politike që në funksion të realizimit të këtij parimi kushtetues, të gjejnë zgjidhjen e përbashkët për konstituimin e Kuvendit”.
Osmani paralajmëroi takime veç e veç me secilin prej katër liderëve të cilët i priti sot në takim të përbashkët.
“Më lejoni të sqaroj se ky është vetëm takimi i parë dhe nëse shihet e nevojshme nga java tjetër do t’i takojë edhe liderët e partive individualisht”, tha Osmani.
Ajo tha se këto nuk janë diskutime për themelimin e qeverisë, pasi siç tha shefja e shtetit, kjo është kompetencë e partive politike.
