Drejtori i Përgjithshëm i Sekretariatit të Këshillit Prokurorial të Kosovës, Sami Istrefi, pas vizitës në ShBA me rastin e Lutjeve të Mëngjesit, ka thënë se ishte nder dhe përjetim i jashtëzakonshëm pjesëmarrja në këtë ngjarje me peshë të veçantë në arenën ndërkombëtare, raporton Veriu.info.
“Përjetësisht falënderues dhe mirënjohës ndaj Shteteve të Bashkuara të Amerikës”, ka thënë istrefi, i cili në këtë vizitë ishte edhe me Kryeprokurorin e Prokurorisë Speciale të Republikës së Kosovës, Blerim Isufaj dhe prokurori special, Naim Abazi.
Postimi i Sami Istrefi:
Ishte nder dhe përjetim i jashtëzakonshëm të marrë pjesë në Lutjet e Mëngjesit në Shtetet e Bashkuara të Amerikës, ngjarje kjo tradicionale me peshë të veçantë në arenën ndërkombëtare, e cila ka bashkuar udhëheqës shtetërorë, përfaqësues të lartë institucionalë dhe personalitete të shquara nga mbarë bota.
Po aq e çmuar dhe domethënëse ishte edhe prezenca e Presidentit të SHBA-së, z. Donald Trump, kongresistëve dhe miqve të tjerë amerikanë në këtë ngjarje, mbështetja e të cilëve ka qenë dhe vazhdon të jetë e palëkundur për popullin dhe shtetin tonë.
Forcimi i vlerave të demokracisë, sundimit të ligjit dhe respektimi i lirive e të drejtave të njeriut na vendosin natyrshëm dhe denjësisht përkrah aleatëve tanë, si pjesë e pandashme e familjes së kombeve të qytetëruara dhe demokratike, duke na obliguar që këto parime t’i mbrojmë, t’i kultivojmë dhe t’i avancojmë çdo ditë, si themel të shtetit, të paqes shoqërore dhe të së ardhmes sonë të përbashkët.
Përjetësisht falënderues dhe mirënjohës ndaj Shteteve të Bashkuara të Amerikës!
🇺🇸🤝🇽🇰
