Presidentja e Kosovës, Vjosa Osmani, tha se ka informacione të besueshme se presidenti amerikan, Donald Trump, ka parandaluar së voni mundësinë e një përshkallëzimi të mundshëm të situatës nga Serbia në Kosovë.
“Ai (Trump) është shumë i qartë në deklaratën e tij se po flet për javët e fundit”, tha presidentja Osmani, duke theksuar se nuk bëhet fjalë për zhvillime të vitit 2023 apo 2020, por “për zhvillime shumë, shumë të vona” tha Presidentja Osmani.
Në lidhje me këtë deklaratë të Presidentes Osmani ka folur për “Gazeta Blic”, ish-deputeti i AAK-së, Shemsedin Dreshaj.
Dreshaj tha se SHBA-të dhe Presdienti Trump nuk improvizojnë dhe se se kërcënimi duket që ka qenë real.
Ai tha se këtë e vërteton edhe heshtja e Ministrave Sveçla dhe Maqedonci.
“Mendoj se SHBA dhe Presidenti Trump nuk improvizojnë. Kërcnimi duket ka qenë real. Këtë verteton konfirmimi Presidentës Osmani, e po ashtu edhe heshtja e Ministrave Sveçla dhe Maqedonci. Shërbimet informative kanë kanale të ndryshme komunikimi. Serbia nuk e ka për herë të parë agresionin direkt ndaj shtetit të Kosovës. Jemi dëshmitarë të akteve terroriste kohëve të fundit, si rasti i Banjskës apo rrezikimi i strukturave jetike për vendin” tha Dreshaj për “Gazeta Blic”.
Dreshaj tha se Serbia do të vazhdojë të jetë faktor kërcënues dhe destabilizues, jo vetëm për Kosovën, por edhe për fqinjët e tjerë.
Ai tha se për të arritur paqe të qëndrueshme ndërmjet Kosovës dhe Serbisë, Kisha dhe politika zyrtare serbe duhet t’i dëshmojnë popullit serb se ‘Kosova nuk është djepi i serbizmit’.
“Derisa Serbia nuk e heq nga Preambula e Kushtetutës së saj frazën se Kosova është pjesë përbërëse e Serbisë, është e pritshme që veprimet kërcënuese të vazhdojnë. Këto veprime të kontestimit të qenies shqiptare në Kosovë nga ana e Serbisë nuk janë të sotme; kjo është një strategji e përgatitur nga Akademia Serbe dhe Kisha Ortodokse. Derisa të vazhdojë kjo mendësi, Serbia do të jetë faktor kërcënues dhe destabilizues, jo vetëm për Kosovën, por edhe për fqinjët e tjerë. Për të arritur një paqe të qëndrueshme ndërmjet Kosovës dhe Serbisë, Kisha dhe politika zyrtare serbe duhet t’i dëshmojnë popullit serb se “Kosova nuk është djepi i serbizmit” — një sentencë kjo që është promovuar nga mesjeta e deri sot” tha Dreshaj në përgjigjen e dhënë për “Gazeta Blic”.
