Bekim Muhaxheri dhe Rina Mehana, dy këshilltarët e rektorit të Universitetit të Prishtinës, Arben Hajrullahu janë paguar nga linja buxhetore për mallra dhe shërbime, pasi Ministria e Financave nuk ka miratuar përfshirjen e tyre në listën e pagave.
Pagesa është bërë në kundërshtim me Ligjin për menaxhimin e financave publike, përmes një vendimi të Këshillit Drejtues të UP-së, i kërkuar nga rektori, që përfshinte kompensim retroaktiv që nga fillimi i vitit.
“Ky vendim është në fuqi deri në gjetjen e zgjidhjes për regjistrim në listën e pagave për të lartpërmendurit sipas legjislacionit në fuqi nga Ministria e Financave, Ministria e Punës së Brendshme dhe Thesari i shtetit të Republikës së Kosovës”, thuhet në vendimin e Këshillit Drejtues.
Mbulimi i pagave nga linja e buxhetit për mallra dhe shërbime është në kundërshtim me Ligjin për Menaxhimin e Financave Publike dhe Përgjegjësitë.
“Një organizatë buxhetore mundet, pa marrjen e miratimit paraprak nga Ministri, të transferojë deri në pesë për qind (5%) të një ndarje buxhetore në një ndarje tjetër të asaj organizate buxhetore gjatë vitit fiskal; megjithatë, këto transfere nuk mund të bëhen në ndarjen buxhetore për paga dhe mëditje pa miratimin paraprak të Ministrit dhe, sipas rastit, Qeverisë ose Kuvendit, sipas paragrafëve 3 dhe 4 të këtij neni”, thuhet në ligj.
