Një rast shqetësues i zhdukjes është raportuar në Fushë Kosovë, ku dy vajza të mitura janë larguar nga banesat e tyre pa lejen e familjarëve dhe nuk janë kthyer që nga data 4 korrik 2025.
Burime të Sinjalit bëjnë me dije se bëhet fjalë për B. Sh. 15-vjeçare dhe L. H. 15-vjeçare, të cilat sipas dëshmisë së prindërve të tyre, R. Sh. dhe A.H., ishin larguar nga shtëpia në intervalin kohor 16:00 deri 20:00, pa paralajmërim dhe pa leje.
Sipas dëshmitarëve, më 09 korrik 2025, rreth orës 17:00, vajzat janë parë për herë të fundit në një veturë të markës Fiat, me ngjyrë të kuqe, por që nga ajo kohë nuk janë kthyer dhe nuk dihet vendndodhja e tyre.
Lidhur me rastin është njoftuar Prokurorja kujdestare, e cila ka urdhëruar të inicohet rasti si “Persona të zhdukur”, dhe hetimet kanë nisur në mënyrë aktive nga autoritetet për të lokalizuar vajzat dhe për të sqaruar rrethanat e zhdukjes.
Kushdo që ka informacion që mund të ndihmojë në lokalizimin e tyre, lutet të lajmërojë menjëherë Policinë e Kosovës.
