Komuna e Prishtinës dyshohet për kurdisje të tenderit “Dekorimet verore, dimërore dhe shënimi i datave me rëndësi – Ritender”, duke ia përshtatur specifikat një kompanie. Një pjesë e madhe e dekoreve që i ka kërkuar duke i specifikuar me fotografi, veçse kanë qenë në depon e kompanisë “Te Fatosi”, që tashmë i ka fituar të dy lotet e këtij tenderi – njërin në vlerë gati 140 mijë euro, e tjetrin rreth 80 mijë. Si Komuna, ashtu edhe kompania në fjalë, nuk kanë kthyer përgjigje lidhur me dyshimet e ngritura.
Tenderi që ka dhënë Komuna e Prishtinës për dekorimin e kryeqytetit me rastin e festave të fundvitit, gjatë verës dhe shënimin e datave me rëndësi, dyshohet të jetë “i kurdisur”, shkruan Gazeta Online Reporteri.net.
Disa nga dekorimet kryesore që janë specifikuar tek dosja e tenderit, veçse kanë qenë në depon e Kompanisë “Te Fatosi” që është shpallur fituese për të dy Lotet. Këto dekorime kanë qenë të ekspozuara vitin e kaluar në një prej qendrave tregtare në vend dhe në dyqanin e kompanisë në fjalë. Kjo dëshmohet edhe në faqet nëpër rrjete sociale edhe të qendrës tregtare në fjalë, por edhe të kompanisë “Te Fatosi”, ku janë postuar fotografi të këtyre dekorimeve të gatshme dhe vetëm është nevojitur transporti dhe vendosja e tyre në sheshet e kryeqytetit. Në dosje thuhet se produktet duhet të duken vizualisht 90 përqind si në fotografitë e prezantuara.
E ndonëse ky tender është edhe për dekorime verore e shënimin e datave me rëndësi, tek dosja nuk ka asnjë specifikë për këto dekorime. Mungojnë edhe dekorimet që identifikojnë kryeqytetin.
Komuna e Prishtinës nuk është përgjigjur në pyetjet e Reporteri.net për këto dyshime dhe mos përfshirjen e dekorimeve verore. Përgjigjje lidhur me dyshimet e ngritura s’ka kthyer as kompania “Te Fatosi”.
Pse e tërhoqi “Te Fatosi” ankesën në OSHP për Lotin 1 – tri javë më pas u shpërblye me kontratë
“Te Fatosi” ishte shpallur fillimisht fituese vetëm për Lotin 2. Me kontratë për Lotin 1 ishte shpërblyer kompania “AGRI BAU SH.P.K”, e cila kishte ofertuar për gati 12 mijë euro më lirë.
Por, kjo pjesë e tenderit ishte pezulluar pas ankesës që kishte dorëzuar “Te Fatosi” në Organin Shqyrtues të Prokurimit.
Në ankesë, kjo kompani pretendonte se Komuna e Prishtinës ka shkelur katër nene të Ligjit për Prokurim Publik, duke e shpërblyer me kontratë kompaninë tjetër.
Aty thuhej se autoriteti kontraktues gjatë vlerësimit të ofertave nuk i ka trajtuar të gjithë tenderuesit në mënyrë të barabartë, e madje e akuzonte komunën se e ka favorizuar kompaninë “AGRI BAU”.
“…ky OE në tenderin e tij ka mangësi të konsiderueshme si dhe ka dokumente të manipuluara, mangësi të cilat e bëjnë plotësisht të papërgjegjshme”, thuhej në ankesë.
Pavarësisht këtyre pretendimeve, kompania “Te Fatosi” e ka tërhequr ankesën më pas.
“Operatori ekonomik “Te Fatosi SH.P.K”, me datën 27.11.2024, përmes platformës elektronike ka njoftuar se tërhiqet nga ankesa lidhur me aktivitetin e prokurimit Ritender – Dekorimet verore, Dimërore dhe shënimi i datave me rëndësi me numër të prokurimit 616-24-8967-2-1-1”.
Tri javë pas tërheqjes së ankesës, Komuna e Prishtinës e ka shpërblyer këtë kompani me kontratë edhe për Lotin 1.
“Autoriteti kontraktues Komuna e Prishtinës shpërblen me kontratë Operatorin Ekonomik “Te Fatosi” SH.P.K, 810326430, në bazë të kriterit Tenderi i përgjegjshëm me çmimin më të lirë prej 139,630.00 E”, thuhet në vendim.
Në këtë vendim, përmenden edhe arsyet e eliminimit të kompanisë “AGRI BAU”.
“Ju keni dorëzuar pajisjen me nr regjistrimi 01-507-QI në pronësi të “Blini Cleaners” SHPK, si dhe pajisjen me nr regjistrimi 01-368-JB në pronësi të “ANEA GRUP”. Kontratat-Marrëveshjet që keni dorëzuar për këto pajisje objekt të kontratës kanë angazhimin dhe kryerjen e punëve me mjetet motoric gjegjësisht kamionat special gjatë instalimeve elektrike, dekorimeve të objekteve dhe punëve ku nevojitet përdorimi i koprës për nevoja të Agribau SHPK. Kontratat-marrëveshjet e dorëzuara janë në kundërshtim me kërkesat e DT’së dhe njoftimit për kontratë”, thuhet në vendim.
“OE-ik në këtë rast është dashur të themelojnë Grup të Operatorëve ose ti paraqes si nen kontraktor “ANEA GROUP” dhe “Blini Cleaners” SHPK, conform LPP’së dhe akteve tjera dytësore”, thuhet tutje në vendim.
Ndryshe, më 30 korrik të këtij viti, Komuna e Prishtinës e kishte anuluar një herë tenderin “Dekorimet verore, dimërore dhe shënimi i datave me rëndësi”, me një arsyetim shabllon, pa dhënë detaje se çka e parapriu këtë akt.
“Ndërprerja e aktivitetit te prokurimit eshte i nevojshëm për shkak të ngjarjeve dhe/apo arsyeve objektive dhe te demonstrueshme te cilat janë jashtë kontrollit të autoritetit kontraktues dhe te cilat kanë qenë të paparashikueshme në kohën e inicimit të aktivitetit të prokurimit”, thuhej në vendim.
Proceduralisht, pothuajse çdo gjë do të ishte në rregull, nëse vendimi i 30 korrikut për anulimin e tenderit do të merrej një ditë më herët, të hënën e 29 korrikut. Kjo për shkak se vendimi për anulimin e këtij tenderi, para hapjes së tij, ishte në kundërshtim me Ligjin për Prokurimin Publik dhe Rregulloren për Prokurimin Publik, dispozita ligjore të cilat përcaktojnë se një aktivitet i prokurimit mund të anulohet së paku tri ditë para hapjes së tenderëve.
Sipas nenit 62, paragrafit 2, nënparagrafit 2.2 të Ligjit të Prokurimit Publik, “para hapjes së tenderëve, ndërprerja e aktivitetit të prokurimit është bërë e nevojshme për shkak të ngjarjeve objektive dhe që mund të demonstrohen dhe/ose arsyeve që janë jashtë kontrollit të autoritetit kontraktues dhe që nuk mund të parashikohen në kohën e inicimit të aktivitetit të prokurimit por kjo duhet të bëhet së paku tre (3) ditë para hapjes së tenderëve”.
Në ritenderin që u shpallë më 29 gusht, pati disa ndryshime të cilat i tejkalojnë ndryshimet për zgjerimin e hapësirave që do të dekorohen, të cilat u përmenden si arsyetim nga Komuna për anulim të tenderit.
Zyrtarët komunalë i futën duart edhe te kriteret e tenderit, duke i ulur standardet e kërkuara. Kështu, ndryshe nga hera e parë, në tenderin e ri ata e larguan krejtësisht kriterin që kërkon certifikatën për standardin evropian për elektrikë.
elektrikë.
Duke mos u mjaftuar me kaq, ata e ulën edhe vlerën e referencave të kërkuara, e cila nga 480 mijë euro sa ishte në fillim, ra në 180 mijë sosh.
Kompania “Te Fatosi” është regjistruar si biznes në ARBK në maj të vitit 2007.
Pronar i saj është Bajram Hyseni. Kjo kompani funksionon me tri njësi.
Aktivitet kryesor të biznesit e ka tregtinë me pakicë të mallrave në dyqane të specializuara, derisa si aktivitet sekondar tregtinë me shumicë jo të specializuar.
