Në vitet e fundit në Skenderajt ndërtimi i objekteve banesore është bërë me një hov të madh. Në redaksinë e Veriu.info muajve të fundit kanë arritur shumë ankesa nga qytetarët, të cilët ankohen se Komuna e udhëhequr nga dyshja Sami Lushtaku dhe Fadil Nura ka lëshuar leje ndërtimore në kundërshtim me aktet ligjore që e rregullojnë këtë fushë.
Ankesat e drejturara në Veriu.info kryesisht kanë të bëjnë me bonus koeficient që i është lëshuar disa kompanive të afërta me pushtetin aktual të Skenderajt.
Koeficienti i ndërtimit bonus (shtesë) është një instrument urbanistik që lejon rritjen e intensitetit të ndërtimit mbi kufijtë bazë, në këmbim të përfitimeve publike si hapësira të gjelbra, infrastrukturë, ose strehim social, por që sipas ankuesve bonusi këtyre kompanive iu është lëshuar për qëllime të përfitimit personal e politk.
Në muajin dhjetor Veriu.info përmes kërkesës për qasje në dokumente publike, ka kërkuar qasje në Komunën e Skenderajt në të gjitha lejet ndërtimore të lëshuara gjatë viteve 2024 dhe 2025. Po ashtu kemi kërkuar qasje edhe në dokumentet që kanë të bëjnë me inspektimet e kryera nga inspektorët e ndërtimit të Drejtorisë së Inspeksionit.
Kryetari i Skenderajt, Sami Lushtaku më 26 dhjetor 2025 ka nxjerrë vendim me të cilin aprovohet kërkesa e gazetares së Veriu.info për qasje në dokumentet e kërkuara.
Deri këtu gjithçka shkonte në rregull. Por loja e pushtetit të Sami Lushtakut nis pas nxjerrjes së këtij vendimi.
Fillimisht zyrtari për qasje në dokumente publike, Amir Lushtaku, njofton se qasja në dokumente publike do të ofrohet përmes Drejtorisë së Urbanizmit më datë 06.01.2026, nga ora 09:00, tek shefja e Urbanizmit Sanije Ahmeti.
Kur gazetarja arrin në zyren e shefes së Urbanizmit, e njëjta i thotë se nuk i ka dokumentet e gatshme, por që deri në fund të muajit janar do t’i bëjë gati dhe t’i ofroj të njëjta.
Kur jemi në muajin prill, portalit Veriu.info nuk i është ofruar akoma asnjëri prej dokumenteve të kërkuara.
Burime të Veriu.info brenda komunës së Skenderajt kanë bërë të ditur se këto veprime të pushtetit të Sami Lushtakut janë bërë me qëllim të humbjes së afatit për ankesë në Agjencinë për Informim dhe Privatësi, si dhe me qëllim të shytjes së çështjes me synim që Veriu.info do ta humb fokusin nga kjo temë.
Veriu.info të hënën, më 6 prill, do ta bëjë kërkesën e njëjtë prapë në Komunën e Skenderajt.
